Nyǵmatýlın: Jańa zań jobasy tutynýshylardy qaýipti taýarlardan qorǵaýdy kúsheıtedi
NUR-SULTAN. QazAqparat – Búgin Májilis spıkeri Nurlan Nyǵmatýlınniń tóraǵalyǵymen Palatanyń jalpy otyrysy ótti. Onda depýtattar «Tehnıkalyq retteý» týraly zań jobasyn birinshi oqylymda maquldady, dep habarlaıdy QazAqparat tómengi palatanyń baspasóz qyzmetine silteme jasap.
Atalǵan mańyzdy qujatty talqylaý barysynda Májilis tóraǵasy jańa zań jobasynyń salmaqty tustaryna erekshe nazar aýdardy. Ol bul zań jobasynyń qazaqstandyq naryqty sapasyz taýarlardan qorǵaýǵa baǵyttalǵanyn aıta kelip: «Eń bastysy, ónim qaýipsiz bolý kerek. Basqa máseleler, mysaly, ónimge markırovka jasaý. Ol jaǵdaıdy kásipkerlerdiń ózderi sheshetin múmkindigi bar. Ol úshin tovardy qaıtarýǵa, nemese ótkizbeýge jol bermeý kerek. Sebebi, bul kásipkerler úshin óte úlken shyǵyn», - dep atap ótti.
Endi osy zań jobasyna sáıkes, memlekettik baqylaý ónimdi ótkizý satysynda ǵana emes, ony elimizdiń aýmaǵyna ákelgenge deıin júrgizetin bolady.
«Jasyratyny joq, osyǵan deıin basqasha boldy. Mysaly, kez kelgen ónimdi biz eń aldymen elge kirgizemiz de, sodan keıin tekseremiz. Qaýipti jaǵdaı bolsa, sonda ǵana anyqtaý bastalady. Endi ónim Qazaqstanǵa kirmeı turyp, memlekettik baqylaýdan ótedi. Qaýipti jaǵdaı anyqtalsa, birden ol taýardy árıne, qaıtaramyz. Bul óte mańyzdy, óte qajetti qadam. Sondyqtan bul normany mindetti túrde qoldaýymyz kerek», - dedi Nurlan Nyǵmatýlın.
Palata spıkeriniń pikirinshe, zań jobasyna engizilgen túzetýler tutynýshylardy qaýipti taýarlardan qorǵaýdy kúsheıtedi.
Sonymen qatar otyrys barysynda depýtattar jaýapty memlekettik organnyń basshysyna birqatar suraqtaryn qoıdy.
Eske sala keteıik, zań jobasy Memleket basshysynyń jańa redaktsııadaǵy tehnıkalyq retteý týraly zańdy daıyndaý qajettigi týraly tapsyrmasyn iske asyrý maqsatynda ázirlendi.
