Nyǵmatýlın: Týrızm ındýstrııasy óz pozıtsııasyna qaıta ornyǵady, soǵan daıyn bolýymyz kerek
«Týrızmniń elimizdiń áleýmettik-ekonomıkalyq damýynda erekshe oryny bar. Bizdiń elimizdiń týrızmdi damytýdyń múmkindigi óte zor. Eń aldymen bizdiń keń baıtaq Qazaqstanymyzdyń tabıǵaty keremet. osy zalda otyrǵan ár depýtat óz týǵan jerin eske alsa, ne bolmasa ózimizdiń astanamyzdyń, Býrabaıdyń, ońtústiktiń jerin alyp qarasaq, eshqandaı shetelge baryp demalýdyń keregi joq. Eń aldymen halqymyzdyń baýyrmal dástúri erekshe. Ol da týrızmniń tynysyn asha alady. Sol úshin elimizde týrızmdi damytýǵa basa kóńil bólinip, naqty sharalar qolǵa alynýda. Basty maqsat – 2023 jylǵa deıin týrızm salasy ekonomıkanyń 8 paıyzyn qurýy tıis», - dedi Nurlan Nyǵmatýlın týrıstik qyzmetke qatysty zań jobasy qaralǵan Májilis otyrysynda.
Májilis spıkeriniń aıtýynsha, álemdik jalpy ishki ónimge týrızmniń qosqan úlesi ótken jyly ǵana 10,5 paıyzdy qurap, 8,3 trln dollarǵa teńesken. Álemdegi 10 jumys ornynyń bireýi týrızm sektorynda qurylǵan.
«Pandemııa týyndatqan daǵdarys erte me, kesh pe aıaqtalady. Sol kezde týrıstik ındýstrııa óz pozıtsııasyna qaıtadan ornyǵady. Bizge daıyn bolý kerek. Týrızm áleýmettik-ekonomıkalyq damý men turaqtylyqty da qamtamasyz etetinin atap ótý kerek. Bul sala shaǵyn bıznesti damytýǵa, jumys oryndaryn ashýǵa kómektesedi», - dedi ol.
Nurlan Nyǵmatýlınniń sózine sensek, astana Almatydan Nur-Sultanǵa kóshken kezde Nursultan Nazarbaevtyń elordadaǵy qurylysqa basa mán bere otyryp, jasyl beldeýdi qurdy.
«Búgin de Býrabaı elordanyń arqasynda damyp ketkenin atap ótý kerek. Sol jaqqa bara jatqanda jol boıynyń ózinde týrıstik salanyń halyq ómirine qanshalyqty yqpal etkenin kóremiz. Sondyqtan týrızmdi damytýdy oılaǵan kezde osynyń bárin saraptaý kerek», - dedi ol.
