Nyǵmatýlın: Standarttaý júıesin qoljetimdi etý úshin «deldaldyń» qajeti joq
ASTANA. QazAqparat - Parlament Májilisiniń jalpy otyrysynda depýtattar «Standarttaý týraly» zań jobasyn birinshi oqylymda talqylady. Onda halyq qalaýlylary zań jobasynyń 14-babyna nazar aýdaryp otyr, dep habarlaıdy «QazAqparat» HAA tilshisi.
Eske sala ketsek, Investıtsııalar jáne damý mınıstri Jeńis Qasymbek «Standarttaý týraly» QR zań jobasynyń birinshi oqylymynda Qazaqstanda standarttaý boıynsha barlyq máselelerdi rettep otyratyn Ulttyq organdy qurýdy usynǵan bolatyn.
Bul usynysqa qatysty depýtattar tarapynan deldaldardyń sany ósip, ol standartqa qoljetimdilik qyzmetiniń qymbattaýyna jol ashýy múmkin degen qaýip aıtyldy. Sondaı-aq, zań jobasynda standarttaý týraly Ulttyq organmen kelisimshart jasasý úshin zańdy jáne jeke tulǵalarǵa qoıylatyn talaptar naqty kórsetilmegen.
Májilis tóraǵasy atalǵan bapty qalyptastyrýdy, júrgizýdi jáne súıemeldeýdi ulttyq standarttaý organy júrgizetin normatıvtik tehıkalyq qujattardyń biryńǵaı memlekettik qoryna nazar aýdarý kerektigin eske saldy.
«Atalǵan aqparattyq júıeni jalpyǵa ortaq qoljetimdi etýge ne kedergi bolyp otyr? Árıne, standarttaý ınstıtýty odan túsken qarjymen aqparattyq júıeni júrgizý boıynsha shyǵyndaryn jabatyny túsinikti. Alaıda, ony taratý úshin arada deldaldyń bolýy qandaı qajettilikten týyp otyr? Onyń ústine zań jobasynda olardy tańdaý boıynsha, qyzmet quny boıynsha, tipti, aqparattardyń shynaıylyǵyna jaýapkershilik týrasynan eshqandaı ólshem, talap belgilenbegen», - deıdi Nurlan Nyǵmatýlın.
Zań jobasynyń úkimettik nusqasynda bul norma «deldal úshin» paıda tabatyn orynnyń ashatynyn aıtqan Májilis tóraǵasy jumys toby ekinshi oqylymǵa deıin osy bapty qarap, mańyzdylyǵyna qatysty naqty sheshim qabyldaýy kerektigin túsindirdi.
Aıta keteıik, zań jobasynyń negizgi maqsaty - sýbektilerdiń jáne olardyń standarttaý salasyndaǵy qyzmetti júzege asyrý protsesindegi qatynastarynyń jıyntyǵy retinde ulttyq standarttaý júıesin qalyptastyrý. Onda standarttaýdyń maqsattary, qaǵıdattary, standarttaý sýbektileriniń quzyreti men olardyń ózara is-qımyl rásimderi naqty aıqyndalǵan. Talqylaýlardan keıin palata depýtattary zań jobasyn birinshi oqylymda maquldady.
