Nyǵmatýlın shahterlerdiń narazylyǵy týraly: Kelissózder júrip jatyr
ASTANA. QazAqparat - QR Parlament Májilisiniń tóraǵasy Nurlan Nyǵmatýlın men Parlament Májilisiniń depýtattary Qaraǵandy oblysyndaǵy shahterlerdiń narazylyǵyna qatysty tilshilerdiń saýalyna jaýap berdi, dep habarlaıdy «QazAqparat» HAA tilshisi.
Májilistiń jalpy otyrysynyń sońynda tilshilerdiń saýalyn tyńdaǵan Nurlan Nyǵmatýlın atalǵan másele boıynsha qazirgi tańda jumys berýshiler men kenshilerdiń kásipodaqtary arasynda dıalog júrgizilip jatqanyn atap ótti.
«Bul jerde eshqandaı emotsııaǵa berilýdiń qajeti joq. Sondyqtan, belgili bir nátıjeni kúteıik», - deıdi Nurlan Nyǵmatýlın.
Májilismen Azat Perýashev ta osyǵan uqsas pikir bildirdi.
«Artyn kúteıik. Kelissózderdiń sońy ne bolaryn baıqaımyz. Jalpy aıtarym, ken týraly zań talqylanǵan kezde biz qazaqstandyq quramdy arttyrý kerektigin aıtqan bolatynbyz. Sonyń ishinde jumysshylardyń jalaqysy da qamtylǵan», - deıdi ol.
Al «Halyq kommýnısteri» fraktsııasy atynan sóz sóılegen Vladıslav Kosarev jýyq arada atalǵan máselege qatysty depýtattyq saýal joldaǵaly jatqanyn jetkizdi.
«Barlyq shahterler óz quqyqtaryn qorǵap otyr. Sheteldik kompanııa shahtalaryndaǵy jumysshylar úshin jaýapkershilikti sezinýi qajet», - deıdi Vladıslav Kosarev.
