Nyǵmatýlın: Ramazan aıy - árbir adamǵa rýhanı birlik pen kúsh-qýat beredi
NUR-SULTAN. QazAqparat - Májilis Tóraǵasy Nurlan Nyǵmatýlın jaqsylyqtyń jarshysy atanǵan Ramazan aıynyń bastalýymen barsha qazaqstandyqtardy quttyqtady, dep habarlaıdy QazAqparat.
«Barsha musylman qaýymyn qasıetti Ramazan aıynyń bastalýymen shyn júrekten quttyqtaımyn. Aılardyń sultany sanalatyn Oraza aıy - keń peıildiń, bereke-birliktiń jáne izgiliktiń, yntymaq pen meıirimdiliktiń kórinisi. Sharapaty men shapaǵaty mol aı halyqty janashyr bolýǵa, qaıyrymdylyq jasap, bir-birine kómektesýge shaqyrady. Osy berekesi men birligi jarasqan Ramazan aıynda jasaǵan ıgi amaldaryńyz, barlyq duǵa-tilekterińiz jáne yqylaspen ustaǵan orazalaryńyz qabyl bolsyn», - dedi Nurlan Nyǵmatýlın.
Sonymen qatar, Májilis Tóraǵasy barlyq qazaqstandyqtardy biriktire túsetin osyndaı qasıetti aıda árbir azamatqa rýhanı kúsh-jiger, árbir otbasyna baq-bereke, amandyq, elimizge tynyshtyq jáne órkenıet tiledi.