Nyǵmatýlın: porttardy damytamyz desek, shetelge qandaı ónim satatynymyzdy naqtylaý qajet
NUR-SULTAN. QazAqparat – Parlament Májilisiniń tóraǵasy Nurlan Nyǵmatýlın Aqtaý men Quryq porttaryn damytý josparyna qatysty oıyn aıtyp, qandaı máselege nazar aýdarý kerektigin jetkizdi, dep habarlaıdy QazAqparat tilshisi.
«Porttardy damytýdy qalaı qolǵa alsaq, keme qatynasyn damytýdy sondaı qarqynmen júrgizý kerek. Sebebi bul eki uǵym qanattas. Porttarsyz eshqandaı keme qatynasy men tranzıt týraly aýyz ashpaı-aq qoıýǵa bolady. Kez kelgen kemeniń basty mindeti – júk tasý. Álbette jolaýshylar kemesi basqa másele», - dedi Májilis tóraǵasy keme qatynasy týraly kelisimdi ratıfıkatsııalaý jónindegi zań jobasyn talqylaý kezinde.
Nurlan Nyǵmatýlınniń aıtýynsha, Indýstrııa jáne ınfraqurylymdyq damý mınıstrligi munaı tası berýdi qoıyp, konteıner tasymalyn arttyrǵaly otyr.
«Bul – durys qadam. Sebebi memleket bıligi de qazir óndiristi tolyq dıversıfıkatsııalaýǵa kóshti. Jyl saıyn qubyr sany artyp, dıversıfıkatsııa júrip jatqandyqtan bizge porttardyń bolashaǵyn oılaý kerek. Alǵashqy porttardyń negizin qalaǵan kezde olardy biz energııa tasymaldaýshy retinde kórdik. Konteıner degenimizben, bizge sonymen qatar «qurǵaq júkke» de ótýimiz kerek shyǵar. Máselen Irannyń soltústiginde bıdaı qabyldaıtyn qanshama oryn salyndy. Ol jerde bizdiń bıdaıymyzdy kútip otyr. Sondyqtan aldaǵy ýaqytta aýyl sharýashylyǵy ónimderine basa mán bergen abzal», - dedi ol.
Nurlan Nyǵmatýlın ishki ekonomıkalyq jospar jasalyp, osyndaı jylda osynshama ónimdi eksportqa shyǵara alamyz degen jospar bolýy tıis ekenin jetkizdi.
«Álbette Aqtaý men Quryq porttary arqyly júk tasymalyn arttyrǵaly jatyrmyz. Alaıda ne eksporttaıtynymyzdy naqty bilip alýymyz kerek. Ne satamyz? Bul jerde naqtylyq bolýy tıis», - dedi ol.
