Nyǵmatýlın: Parlamentaralyq únqatysý - Qazaqstan men Reseıdiń yntymaqtastyǵyn nyǵaıtady
MÁSKEÝ. QazAqparat - Parlamentaralyq yntymaqtastyqty nyǵaıtý - Qazaqstan men Reseıdiń tatýkórshilik qatynasyn tereńdetýdiń mańyzdy faktorlarynyń biri.
Bul týraly Májilis tóraǵasy Nurlan Nyǵmatýlın búgin Máskeýde ótken Memlekettik Dýma men Parlament Májilisi arasyndaǵy yntymaqtastyq týraly palataaralyq parlamenttik komıssııanyń 10-otyrysynda sóılegen sózinde aıtty, dep habarlaıdy Májilistiń baspasóz qyzmeti.
Qos el parlamentteri palatalarynyń basshylary Nurlan Nyǵmatýlın men Vıacheslav Volodınniń qatysýymen kún tártibindegi máselelerdi talqylaý kezinde Májilis tóraǵasy ekonomıkalyq ózara is-qımyl, aımaqtyq jáne shekaralas yqpaldastyqty nyǵaıtýdyń mańyzdylyǵyna toqtaldy.
Qazirgi ýaqytta Qazaqstan men Reseı arasynda 2017-2020 jyldarǵa arnalǵan ındýstrııalyq-ınvestıtsııalyq baǵdarlama ázirlenýde.
Májilis spıkeriniń pikirinshe, tsıfrlandyrý máselesi aıryqsha nazar aýdararlyq. Osy rette N. Nyǵmatýlın ınnovatsııalyq tehnologııalardy engizý, ekonomıkany tsıfrlandyrý Qazaqstan Prezıdenti Nursultan Nazarbaevtyń halyqqa Joldaýynda aıtylǵan mańyzdy mindetterdiń biri ekenin atap ótti.
Osyǵan oraı, N. Nyǵmatýlın atalǵan komıssııanyń 10-otyrysyna engizilgen tsıfrlyq ekonomıkany damytýdy jáne onyń básekege qabilettiligin arttyrýdy zańdyq turǵydan qoldaý máselesiniń ózektiligine kóńil bóldi.
Sonymen birge, otyrys kún tártibinde shekaralas yntymaqtastyqtyń perspektıvalary, kólik jáne logıstıka, mádenı-gýmanıtarlyq salalarda áriptestikti damytý máseleleri talqylandy.
