Nyǵmatýlın Ózbekstannyń parlamenttik delegatsııasyn qabyldady
ASTANA. QazAqparat - Májilis tóraǵasy Nurlan Nyǵmatýlın Ózbekstan Olıı Majlısi Zań shyǵarýshy palatasy tóraǵasynyń orynbasary Borıı Alıhanov bastaǵan Ózbekstannyń parlamenttik delegatsııasyn qabyldady, dep habarlaıdy QazAqparat Májilistiń baspasóz qyzmetine silteme jasap.
N. Nyǵmatýlın atap ótkendeı, Ózbekstan Ortalyq Azııadaǵy Qazaqstannyń mańyzdy strategııalyq seriktesi bolyp tabylady jáne eki el arasyndaǵy dostyq pen yntymaqtastyq saıasaty budan ári tereńdeı túspek.
Májilis tóraǵasynyń aıtýynsha, elderdiń ózara baılanysynyń keńeıýine jańa serpin bergen Qazaqstan men Ózbekstan prezıdentteri Nursultan Nazarbaev pen Shavkat Mırzıeevtyń memlekettik saparlary boldy. Memleket basshylarynyń kezdesýi nátıjesinde strategııalyq seriktestikti odan ári tereńdetý jáne tatý kórshilikti nyǵaıtý týraly Birlesken deklaratsııaǵa qol qoıyldy.
N.Nyǵmatýlın Ózbekstannyń eki palataly Parlamentiniń qyzmetinde ózbek depýtattarynyń alǵashqy sapary ekijaqty qarym-qatynastardy odan ári damytýǵa oń yqpal etetinine senim bildirdi.
Sonymen qatar, Májilis tóraǵasy elimizdiń halyqaralyq arenadaǵy bastamalaryna, atap aıtqanda 2017-2018 jyldardaǵy BUU QK músheligi, Astanada ótken EKSPO-2017 kórmesine qoldaý kórsetkeni úshin alǵys bildirdi. Sonymen qosa Ózbekstannyń parlamenttik delegatsııasyn Májilistiń qyzmetimen tanystyryp, Qazaqstan Respýblıkasy Prezıdentiniń «Qazaqstan-2050» Strategııasynda jáne Qazaqstannyń úshinshi jańǵyrýy mindetterin oryndaý boıynsha atqarylǵan jumystar týraly aıtty.
Taraptar áńgimelesý barysynda parlamentaralyq yntymaqtastyq toptarynyń áleýetin belsendi paıdalanýǵa, sondaı-aq, Palatalardyń beıindi komıtetterimen tyǵyz qarym-qatynasta jumys isteýge shaqyrdy.
Jalpy Parlamentaralyq yntymaqtastyq toptarynyń birinshi birlesken otyrysynyń kún tártibi saýda-ekonomıkalyq jáne mádenı-gýmanıtarlyq ózara is-qımyl, sý resýrstaryn basqarý máselelerin talqylaýǵa arnaldy.
Ózbekstannyń parlamenttik delegatsııasy sapar barysynda Qyzylorda jáne Ońtústik Qazaqstan oblystaryna barýdy josparlaǵan.
