Nyǵmatýlın men Volodın parlamentaralyq yntymaqtastyqty nyǵaıtý máselelerin talqylady
ASTANA. QazAqparat - Májilis Tóraǵasy Nurlan Nyǵmatýlın Reseı Federatsııasy Federaldyq Jınalysy Memlekettik Dýma Spıkeri Vıacheslav Volodınmen kezdesti, dep habarlaıdy Májilistiń baspasóz qyzmetinen. Bul - mártebeli meımannyń osy qyzmetke taǵaıyndalǵannan keıingi shetelderge alǵashqy resmı sapary.
Kezdesý barysynda Májilis Spıkeri elder parlamentshileriniń yntymaqtastyǵy qos memleket halyqtarynyń múddesi jolynda nyǵaıa túsetindigin atap ótti.
Eki el basshylarynyń ózara túsinistik pen dostyq qarym-qatynastarynyń arqasynda damý bıigine bet burǵan yqpaldastyqqa aıryqsha nazar aýdarǵan Májilis Spıkeri:
« Búgingi kúni Qazaqstan jáne Reseı Federatsııasy arasyndaǵy strategııalyq áriptestik jyl saıyn joǵary deńgeıge kóterilip keledi.
Ol - eki eldiń Prezıdentteri Nursultan Ábishuly Nazarbaev pen Vladımır Vladımırovıch Pýtınniń salıqaly saıasattarynyń nátıjesi. Osy jolda Parlament Májilisiniń jáne Memlekettik Dýmanyń negizgi mindeti tıimdi zańdar qabyldaý», - dedi.
N. Nyǵmatýlınniń aıtýynsha, búgingi kúni bizdiń elderimizdiń arasynda senimdi saıası únqatysý jaqsy jolǵa qoıylǵan, júıeli ekonomıkalyq qatynas ornaǵan, qaýipsizdik salasyndaǵy yqpaldastyq tıimdi damyp keledi.
Májilis Tóraǵasy sondaı-aq, eki el parlamentteriniń arasyndaǵy ózara is-qımyldyń da óte joǵarǵy deńgeıde qarqyn alyp otyrǵanyn aıtty. Oǵan Reseı Spıkeriniń 25 jyldyq mereıtoı qarsańynda alǵashqy resmı saparyn Qazaqstannan bastaýy dálel deýge bolady. Reseı delegatsııasynyń quramynda Memlekettik Dýma komıtetteriniń tóraǵalary da bar.
Júzdesý barysynda Májilis Spıkeri Reseı Federatsııasynyń Konstıtýtsııa kúnimen quttyqtap, Reseı halqyna beıbitshilik pen gúldený tiledi. Óz kezeginde Reseı Spıkeri V. Volodın de Qazaqstan táýelsizdiginiń 25 jyldyq mereıtoıynyń mańyzy zor ekenin alǵa tarta kelip:
«Bizdiń kezdesýimiz Qazaqstan úshin aıryqsha mańyzdy kezeńde ótip jatyr. Táýelsizdiktiń 25 jyldyǵy. Osy ýaqyttar ishinde Qazaqstannyń qalaı ózgergenin kórip otyrmyz. Astananyń keremettigine de kózimiz jetti. Bul jerde Qazaqstan Prezıdentine arnaý aıryqsha bolmaq. Sebebi, Memleket basshysynyń árbir qadamy, árbir sheshimi Qazaqstan halqynyń ómir sapasyn arttyryp, memlekettik damý jolyna jetelep otyr. Reseı parlamentshileriniń atynan Qazaqstan azamattaryn táýelsizdik kúnimen quttyqtaımyn»,-dedi.
Odan ári taraptar parlamentaralyq yntymaqtastyqtyń odan ári tereńdetýdiń ózekti suraqtaryn talqylady.
