Nyǵmatýlın: Májilis áleýmettik kásipkerlikti damytý týraly zań jobasyn qaraıdy
NUR-SULTAN. QazAqparat - Búgin Májilis spıkeri Nurlan Nyǵmatýlınniń tóraǵalyǵymen Palata bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat tómengi palatanyń baspasóz qyzmetine silteme jasap.
Bıýro otyrysynda depýtattardyń bastamasymen ázirlengen áleýmettik kásipkerlikti damytý máseleleri týraly zań jobasyn I oqylymda qaraý usynyldy.
Atalǵan zań jobasy elimizdegi áleýmettik kásipkerlikti damytýdyń tetikterin zańnamalyq retteý jáne júıelendirý maqsatynda ázirlendi.
Sondaı-aq, aldaǵy jalpy otyrysta salyq jáne bıýdjetke tólenetin basqa da mindetti tólemder týraly Salyq kodeksine zańnamalyq túzetýlerdi engizetin zań jobasy I oqylymda qaralmaq.
Sonymen qatar, depýtattar nazaryna birqatar ratıfıkatsııalyq zań jobalaryn qaraý usynyldy. Olar: Qazaqstan men Ázerbaıjan arasyndaǵy kóshi-qon salasyndaǵy yntymaqtastyqqa qatysty kelisim jáne Eýrazııalyq ekonomıkalyq odaq týraly shartqa ózgerister engizý týraly hattama.
