Nyǵmatýlın Konstıtýtsııaǵa túzetý engizý jóninde pikir bildirdi
ASTANA. QazAqparat - Májilis Tóraǵasy Nurlan Nyǵmatýlın Qazaqstan Respýblıkasynyń Konstıtýtsııasyna ózgerister men tolyqtyrýlar engizý jóninde óz pikirin bildirdi, dep habarlaıdy tómengi palatanyń baspasóz qyzmetinen.
Ata Zańǵa túzetýler jóninde «Konstıtýtsııalyq reforma - bul myqty prezıdenttik bılikti saqtaı otyryp, eń aldymen demokratııany odan ári nyǵaıtý, halyqtyq bılik negizin kúsheıtý, Parlament pen Úkimettiń jaýapkershiligin arttyrý, -dep pikir bildirdi.
Májilis Spıkeri Nurlan Nyǵmatýlınniń tóraǵalyǵymen Parlament Palatalarynyń birlesken otyrysy ótip, halyq qalaýlylary «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Qazaqstan Respýblıkasy Zańyn ekinshi oqylymda maquldaǵan bolatyn.
Konstıtýtsııaǵa túzetýlerdi ekinshi oqylymǵa daıyndaý barysynda Parlament depýtattarymen birge Konstıtýtsııalyq keńes, Bas Prokýratýra, Joǵarǵy sot, Notarıaldyq palatalar, Quqyq qorǵaý organdary akademııasy, Kásipodaqtar federatsııasy, Zańgerler odaǵy, Ádilet mınıstrligi sottyq saraptama ortalyǵy basqa da ókilderdiń qatysýymen keń kólemde talqylandy.
Pikirlesýge birqatar memlekettik emes uıym músheleri de qatysty. Zańnamalyq normalar jáne Senat pen Májilis depýtattary engizgen ózgerister birlesken komıssııa otyrysynda qaraldy. Parlament Palatalary depýtattarynyń aldynda baıandama jasaǵan, atalǵan zań jobasy boıynsha qurylǵan birlesken komıssııanyń tóraǵasy, Májilis depýtaty Nurlan Ábdirov memleket basshysy usynyp otyrǵan zań jobasy Konstıtýtsııanyń 19 babyna 26 túzetý engizýdi kózdeıtindigin atap ótti.
Konstıtýtsııada kózdelip otyrǵan barlyq usynystardy jan-jaqty baıandaı kelip, Nurlan Ábdirov Birlesken komıssııanyń «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Qazaqstan Respýblıkasy Zańynyń jobasyn ekinshi oqylymda tutastaı qabyldaýdy usynatyndyǵyn jetkizdi. Usynys Parlament depýtattarynan biraýyzdan qoldaý taýyp, tıisti qaýly qabyldandy.
Otyrys sońynda Májilis Tóraǵasy: «Biz Elbasymyz Nursultan Ábishuly Nazarbaevtyń usynystaryn negizge alyp, Konstıtýtsııamyzǵa engizilgen barlyq ózgeristerdi qabyldadyq. Osy tarıhı sheshimmen barshańyzdy shyn júrekten quttyqtaımyn»,-dedi. Zań odan ári Elbasyna qol qoıýǵa joldanady.
