Nyǵmatýlın Qazaqstandaǵy Iran elshisimen kezdesti

ASTANA. QazAqparat - Májilis tóraǵasy Nurlan Nyǵmatýlın Qazaqstandaǵy Iran Islam Respýblıkasynyń Tótenshe jáne Ókiletti elshisi Modjtabý Damırchılýdy qabyldady. Buúl týraly Májilistiń baspasóz qyzmeti habarlady. 

Kezdesýde ekijaqty qarym-qatynaspen qatar, parlamentaralyq únqatysýdy nyǵaıtýdyń mańyzdy suraqtary talqylandy.

Májilis spıkeri elshini atalǵan memlekettiń ulttyq kúni - Islam revolıýtsııasynyń 38 jyldyǵymen jáne eki el arasyndaǵy dıplomatııalyq qarym-qatynastyń ornaǵanyna 25 jyl tolýymen quttyqtady.

Nurlan Nyǵmatýlınniń aıtýy boıynsha, ótken jylǵy Qazaqstan Prezıdenti Nursultan Nazarbaevtyń Iranǵa jáne Iran Prezıdenti Hasan Rýhanıdyń Qazaqstanǵa resmı issaparlary eki el baılanysynyń nyǵaıýyna aıryqsha serpin berdi.

Iran elshisimen halyqaralyq máselelerdi talqylaý barysynda N.Nyǵmatýlın Iranmen tatý kórshilik qatynastardy damytý bizdiń elimizdiń eń mańyzdy syrtqy saıası basymdyqtarynyń biri ekenin atap ótti.
Sonymen qatar, N.Nyǵmatýlın Qazaqstannyń halyqaralyq jáne aımaqtyq ózekti máseleler tóńiregindegi belsendi jáne syndarly ustanymyna toqtaldy. Naqtylaı ketetin bolsaq, Elbasynyń bastamasymen Qazaqstannyń Iran ıadrolyq baǵdarlamasy aıasynda kelissóz alańyn usynýy áńgime ózegine aınaldy.
Májilis spıkeri sondaı-aq, Qazaqstannyń bastamasymen Astana qalasynda azyq-túlik qaýipsizdigi jóninde Islam Uıymynyń qurylýyn qoldaǵany úshin Iran memleketine alǵysyn bildirdi. «Qazaqstan Prezıdenti 2017 jyly 10-11 qyrkúıekte Astanada ǵylym jáne tehnologııa boıynsha IYU Sammıtin shaqyrý týraly bastama kóterdi. Biz, osy joǵary deńgeıdegi mańyzdy is-sharaǵa Tegeran belsendi túrde qatysady dep úmittenemiz», - dedi Nurlan Nyǵmatýlın.
Sırııadaǵy jaǵdaı týraly aıta kelip, Májilis tóraǵasy onyń aımaqtyq problemalar sheńberine syımaıtyn, álemdik deńgeıdegi kúrdeli daǵdarystardyń biri ekenin aıtty. «Qazaqstan bul janjaldy retteýge baǵyttalǵan halyqaralyq qaýymdastyq qabyldaǵan sharalardy qoldaıdy», - dedi.
Óz kezeginde M.Damırchılý, Irannyń Qazaqstan Prezıdenti Nursultan Nazarbaevtyń halyqaralyq jáne aımaqtyq máselelerdi sheshý jolyndaǵy barlyq bastamalaryn quptaıtyndyǵyn jetkizdi.
Parlamentaralyq deńgeıdegi jumys jaıyn sóz etkende Májilis tóraǵasy osy sessııa sońyna deıin Parlamenttiń aldynda mańyzdy reformalardy zańnamalyq qoldaý boıynsha aýqymdy jumystar atqarylatynyna toqtaldy.Kezdesý ıeleri parlamentaralyq tıimdi baılanys ekijaqty qarym - qatynastardy odan ári tereńdetýge septigin tıgizetinine senimdi.