Nyǵmatýlın Qatardaǵy Parlamentaralyq odaq aıasynda RF Dýma spıkerimen kezdesti
NUR-SULTAN. QazAqparat - Májilis Tóraǵasy Nurlan Nyǵmatýlın Qatar astanasy Doha qalasynda ótip jatqan Parlamentaralyq odaqtyń 140-shy Assambleıasy alańynda Reseı Memlekettik Dýmasynyń spıkeri Vıacheslav Volodınmen kezdesti, dep habarlaıdy QazAqparat tómengi palatanyń baspasóz qyzmetine silteme jasap.
Taraptar Qazaqstan men Reseı parlamentaralyq yntymaqtastyǵynyń ózekti máselelerin talqylap, onyń zor áleýeti men odan ári damytýǵa qatysty ortaq maqsattardy atap ótti.
Kezdesý barysynda Nurlan Nyǵmatýlın Qazaqstan osyǵan deıin elimizdiń Tuńǵysh Prezıdenti Nursultan Nazarbaevtyń Reseı Prezıdenti Vladımır Pýtınmen qol jetkizgen kelisimderin júzege asyrýdy, sondaı-aq Reseımen strategııalyq ózara is-qımyldy nyǵaıtýdy jalǵastyratynyna toqtaldy. Bul baǵytta Májilis tóraǵasy eki eldiń Parlamentteri aǵymdaǵy jylǵy parlamentaralyq is-qımyldarǵa basa nazar aýdaratynyna senim bildirdi.
Óz kezeginde, Memlekettik Dýma tóraǵasy Vıacheslav Volodın Reseı men Qazaqstan arasyndaǵy qarym-qatynastardyń damý qarqynyna kóńil bólip, bul baǵytta eki el Prezıdentteriniń orasan jumystar atqaryp jatqanyn aıtty. V.Volodınniń pikirinshe, «osy rette Qazaqstan Respýblıkasynyń Tuńǵysh Prezıdenti Nursultan Nazarbaevtyń róli óte zor».
N.Nyǵmatýlın men V.Volodın aǵymdaǵy jyldyń 23-24 qyrkúıeginde Nur-Sultan qalasynda ótetin Eýrazııa elderi Parlamentteri spıkerleriniń IV Keńesine daıyndyq máselelerin de talqylady. Memlekettik Dýma spıkeri atap ótkendeı, kóptegen elderdiń qyzyǵýshylyǵyn esepke ala otyryp, Keńes jumysyn aldaǵy ýaqytta da júzege asyrý qajet. V.Volodınniń pikirinshe, bul ashyq dıalog aıasynda kóptegen mańyzdy máselelerdi talqylaýǵa jáne sheshýge múmkindik beredi.
