Nyǵmatýlın: Elbasynyń saıası reformaǵa arnalǵan Úndeýi úlken qoldaýǵa ıe boldy
ASTANA. QazAqparat - Májilis Tóraǵasy Nurlan Nyǵmatýlın Almaty oblysyna jumys sapary aıasynda «Hılnıchenko ı K» kommandıttik seriktestiginde bolyp, Eskeldi aýdany Qarabulaq aýyly halqymen kezdesti.
Bul týraly QR Parlamenti Májilisiniń baspasóz qyzmeti habarlaıdy.
Kezdesýde Májilis Spıkeri Elbasynyń bılik tarmaqtary arasynda ókilettikterdi qaıta bólý týraly Úndeýi men bıylǵy dástúrli Joldaýyna aıryqsha kóńil bólip, bolashaq mańyzdy mindetterdi túsindirdi.
«Hılnıchenko ı K» kommandıttik seriktestigi - 567 sharýashylyqtyń basyn qosyp otyrǵan iri qojalyq. Ieligindegi 39 myń ga jerdiń 37 myńyn aýyl sharýashylyǵy maqsatynda paıdalanady. Qant qyzylshasyn ósirýge erekshe den qoıǵan sharýashylyq bıyl 333 ga jerge atalǵan kókónis túrin ekken.
Nyǵmatýlın Joldaýdyń agrarlyq sektordy qoldaýǵa serpin beretinin aıtyp, osy joldaǵy basym baǵyttarǵa toqtaldy.
Al, aýyl halqymen júzdesýde Joldaýmen birge, saıası júıeni reformalaý máselesine de kóńil bólgen Palata Spıkeri eń áýeli tıimdi prezıdenttik basqarýdyń arqasynda 25 jyl ishinde jetken tolaǵaı tabystarǵa toqtaldy. Ol júıe Qazaqstandy barlyq qıyndyqtardan aman alyp shyǵyp, álem tanyǵan áıgili memleketke aınaldyrdy.
Al, jańa reforma osy damý jolymyzdyń zańdy jalǵasy bola otyryp, eldi basqarýdyń jańa talaptarǵa tótep bere alatyn, tıimdi, turaqty, zamanaýı júıesin qurýdy qamtamasyz etpek.
Kezdesý barysynda aýyl halqyn tolǵandyrǵan áleýmettik máseleler de nazardan tys qalmady.
Bul taqyryp Májilis Tóraǵasynyń aýdandyq emhana ókilderimen kezdesýinde de áńgime ózegine aınaldy.
«Elbasymyz Nursultan Ábishuly Nazarbaevtyń saıası reformaǵa arnalǵan Úndeýi jáne bıylǵy tarıhı Joldaýy Almaty oblysynda da úlken qoldaýǵa ıe boldy. Osy kezdesýler bizdiń Prezıdentimizdiń jańa damý baǵyttary halqymyzǵa erekshe serpin beretinin dáleldeıdi. Osy qoldaý, osy senim aldaǵy bıik maqsattarǵa jetýdiń basty kepili ekeni sózsiz», - dedi Nyǵmatýlın Almaty oblysyna sapary jaıly.
Májilis Spıkeri atap ótkendeı, Elbasynyń barlyq bastamalary qazaqstandyqtardyń ómir sapasyn jaqsartýǵa, basqarý tıimdiligin arttyrýǵa, uzaqmerzimdi ekonomıkalyq turaqtylyqty qamtamasyz etýge baǵyttalǵanyn saılaýshylar jete túsinedi, sondyqtan búkilhalyqtyq qoldaýǵa ıe bolýda.
