Nyǵmatýlın Ekologııa mınıstrine: Aýylǵa baryp kelińiz...
NUR-SULTAN. QazAqparat – Parlament Májilisiniń tóraǵasy Nurlan Nyǵmatýlın Ekologııalyq kodekstiń jobasyn qatań synǵa aldy, dep habarlaıdy QazAqparat tilshisi.
Aıta ketsek, Parlament Májilisiniń otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev Ekologııalyq kodekstiń jobasyn qorǵaǵan bolatyn.
Zań jobasy boıynsha Parlamet Májilisiniń tóraǵasy Nurlan Nyǵmatýlın pikirin bildirdi.
«Zań jobasyn qarasaq bylaı: máselen Qaraǵandy oblysynyń Ulytaý aýdanynyń turǵynynyń 5-10 taýyǵy bar delik. Ony deklaratsııalaý úshin ol oblystyq tabıǵı resýrstar basqarmasyna barýy kerek. Al ol oblys ortalyǵynda ornalasqan. ıAǵnı, ol tipti 5 emes, tipti 1 taýyǵyn deklaratsııalaý úshin 700 shaqyrymdy júrýi kerek. Kodekste osylaı jazylǵan. Nelikten olaı? Siz kodekste (Maǵzum Myrzaǵalıevke qarata) «100 jáne odan tómen bas úshin» dep jazasyz. Oǵan, ıaǵnı, mal bolsyn, qus bolsyn kiredi. Ol sanǵa 99 maldy da, 1 maldy da kirgizýge bolady. Álbette bir tabynnyń bir taýyqqa qaraǵanda ekologııaǵa tıgizetin áseri mol ekenin aldymen túsinip alý kerek. Bul normany jazǵan kezde oılaný kerek bolatyn», - dedi Nurlan Nyǵmatýlın.
Májilis tóraǵasy zań jobasyn osyndaı normalaryn oqyǵan kezde «bul normany jazǵan adam aýylda boldy ma?» degen suraq týyndaıtynyn aıtyp ótti.
«Bolmaǵan shyǵar. Shirkin, osy normany jazǵan adamdy 2-3 aıǵa aýylǵa jiberse ǵoı. Sonda ǵana ol adam taýyq pen sıyrdyń aıyrmashylyǵyn túsinetin edi. Qalaı oılaısyz, mınıstr myrza? Kodeksti qabyldaǵannan keıin aýylǵa baryp kelińiz», - degen Nurlan Nyǵmatýlın ekinshi oqylymda osy olqylyqtardy retke keltirýdi tapsyrdy.
