Nyǵmatýlın bıýdjetti baqylaýda Elbasynyń nusqaýlaryn oryndaý jaıyn aıtty
Osyǵan oraı Ulttyq ekonomıka mınıstrligi ókilderiniń bıýdjet zańnamasyn jetildirýge qatysty birinshi oqylymda usynǵan túzetýler kezinde Májilis depýtattary bıýdjet qarjysynyń tıimdi jumsalýyna qatysty suraqtardy nazardan tys qaldyrmady.
«Bıýdjet qarjylarynyń tıimsiz ıgerilýine qatysty naqty ólshem bolý kerek. Áıtpese, sizder Bıýdjet kodeksinde túsinik retinde usynyp otyrǵan «nátıjelilik», «jaýapkershilik», «perspektıvti» sııaqty jalpylama sózder aýqymdy memleket qarjysyn bólý kezinde naqty dálel bola almaıdy. Óıtkeni olardyń eshqaısynyń tájirıbelik, qoldanbalyq sıpaty joq. Al, sýbektıvti baǵalaýdyń sońy jaqsylyqqa aparmaýy múmkin. Eger qarjy bir memlekettik organnan basqa organǵa qaıta bólinetin bolsa, ne úshin olaı bolǵanyna, ne sebepten tıimsiz oryndalǵanyna jáne sońǵy nátıjesine jaýap berýimiz kerek. Osydan keıin ǵana jeke jaýapkershilikke qadam jasaı alamyz, - dedi Nurlan Nyǵmatýlın Ulttyq ekonomıka mınıstri Tımýr Súleımenovke qarata sóılegen sózinde.
Odan ári N. Nyǵmatýlın ekinshi oqylymǵa deıin «tıimsiz oryndaý» túsiniginiń qarjygerlerge de, qarapaıym azamatqa da túsinikti naqty anyqtamasyn tujyrymdaý qajettigin aıtty.
Talqylaý kezinde kvazımemlekettik sektor qarajattar kóleminiń Ulttyq ekonomıka mınıstrligi deńgeıinde ǵana kelisiletindigi synǵa alyndy.
Spıkerdiń aıtýynsha, Prezıdent birneshe márte Úkimetke baqylaýǵa alýǵa tapsyrǵan memlekettik zaım máseleleri taǵy da mınıstrlik deńgeıine túsip otyr. Mınıstrlik usynyp otyrǵan redaktsııa Elbasynyń bıýdjetti baqylaý jónindegi nusqaýlarymen sáıkes kelmeıdi. Sondyqtan bul normany Prezıdent tapsyrmasyn esepke ala otyryp, qaıtadan tııanaqtaý qajet.
