Nyǵmatýlın: Bul sessııa Májilis tarıhyndaǵy eń mańyzdy kezeńderdiń biri boldy
ASTANA. QazAqparat - Ótken sessııa saıası jańǵyrýdyń sessııasy boldy. Búgin palatanyń jalpy otyrysynda QR Parlamenti Májilisiniń tóraǵasy Nurlan Nyǵmatýlın osylaı málim etti, dep habarlaıdy QazAqparat.
«Biz búgin ekinshi sessııa boıynsha Májilistiń sońǵy jalpy otyrysyn ótkizip otyrmyz. Bul sessııa Májilis tarıhyndaǵy eń mańyzdy kezeńderdiń biri boldy dep aıtýǵa bolady. Sebebi osy ýaqytta bizdiń Qazaqstanymyzdyń Táýelsizdigine 25 jyl toldy. Osyǵan baılanysty depýtattardyń belsene qatysýymen Qazaqstan Táýelsizdigine 25 jyl tarıhı Deklaratsııasy da qabyldandy. Sonymen birge Elbasy Nursultan Ábishuly Nazarbaevtyń bastamasymen iri konstıtýtsııalyq reforma júrgizildi, ony sapaly zańmen qamtamasyz etý úshin bizdiń depýtattarymyz úlken jumysty atqardy. Nátıjesinde, elimizdiń Konstıtýtsııasyna, basqa da kóptegen mańyzdy zańdarǵa ózgerister engizildi»,-dedi Nurlan Nyǵmatýlın.
Onyń sózine qaraǵanda, taǵy bir úlken ózgeristiń biri -Májilis jumysynyń ashyq bolýy.
«Ózderińiz jaqsy bilesizder, sessııa ashylǵannan keıin jalpy otyrystar jáne úkimet saǵattary onlaın rejimde búkil respýblıkaǵa kórsetildi. Bul Májilis jumysyn burynǵydan da ashyq etti. Sonymen qatar bizde ótken sharalarǵa memlekettik organdarmen birge, qoǵamdyq uıym músheleri, Májiliske kirmegen partııalar qatysyp, olarmen birge jumys atqardyq. Osylardyń barlyǵy judyryqtaı jumylyp, birlese jasalǵan jumystyń nátıjesi dep aıtýǵa bolady»,-dedi N. Nyǵmatýlın.
Atap aıtqanda, osy sessııada Májilistiń 38 jalpy otyrys ótip, onda 226 másele qaraldy. Atalǵan kezeńde palata 84 zań jobasyn talqylap, maquldap, Senatqa baǵyttady.
«Bul aıtardyqtaı jaqsy jumys kólemi. Sonymen qatar 16 úkimet saǵatty, eki parlamenttik tyńdaý, 25 dóńgelek ústel, Májilis komıtetteriniń 17 kóshpeli otyrysy jáne 4 halyqaralyq ǵylymı-tájirıbelik konferentsııa ótkizildi»,-dedi Májilis tóraǵasy.
Munymen qosa, ol bul sessııada Májilis depýtattary 15 zań jobasyna bastamashy bolyp, sonyń 10-y qabyldandy.
