Nyǵmatýlın Bosnııa jáne Gertsegovına Prezıdentimen kezdesti

ASTANA. QazAqparat - Májilis tóraǵasy Nurlan Nyǵmatýlın Islam yntymaqtastyǵy uıymynyń ǵylym jáne tehnologııalar jónindegi sammıti barysynda Bosnııa jáne Gertsegovına Prezıdenttigi Prezıdıýmynyń Tóraǵasy B. Izetbegovıchpen kezdesti, dep habarlaıdy Májilistiń baspasóz qyzmeti.

Májilis spıkeri eki el arasynda dıplomatııalyq qatynastyń ornaǵanyna 20 jyl tolǵan jáne Islam yntymaqtastyǵy uıymynyń sammıti aıasynda ótip jatqan kezdesýdiń mańyzdylyǵyna toqtala kelip, mártebeli meımannyń bul jolǵy sapary ózara yntymaqtastyqty tereńdetýge yqpal etetinin atap ótti.  

Bosnııa jáne Gertsegovına Qazaqstannyń Balqan aımaǵyndaǵy  mańyzdy áriptesi bolyp tabylady.

N. Nyǵmatýlın Qazaqstan Prezıdenti Nursultan Nazarbaevtyń táýelsizdik alǵan kúnnen bastap, Azııa elderimen, sonyń ishinde, Islam yntymaqtastyq uıymy aıasynda yqpaldastyqty kúsheıtýge erekshe nazar aýdaryp kele jatqanyn aıtty. 21 ǵasyrdaǵy tehnologııalyq jańalyqtar, bilim jáne ınnovatsııalyq ǵylym jarqyn bolashaqtyń kepili. Sol úshin Qazaqstan Prezıdenti atalǵan sammıtti ótkizý týraly bastama kótergenin alǵa tartqan Májilis tóraǵasy mańyzdy shara IYU múshe-memleketterdiń tamyrlastyǵyn tereńdetýge tyń serpin beretin bolady dedi.

Óz kezeginde B. Izetbegovıch Qazaqstannyń tehnologııalyq joǵary jetistikteri qyzyqtyratynyn jáne eki elder arasyndaǵy áriptestikti nyǵaıtýǵa asa múddeli ekenin jetkizdi.   

Taraptar halyqaralyq jáne parlamentaralyq yntymaqtastyq jaıyna da basa kóńil bólip,  zańnamalyq tájirıbe almasý jaıyn sóz etti.