Nyǵmatýlın Bishkekte UQShU PA keńesiniń otyrysyna qatysty
BІShKEK. QazAqparat - QR Parlament Májilisiniń tóraǵasy Nurlan Nyǵmatýlın Bishkekte ótip jatqan UQShU Parlamenttik Assambleıasy Keńesiniń kóshpeli otyrysynda sóz sóıledi, dep habarlaıdy QazAqparat.
Májilis baspasóz qyzmetiniń málimetinshe, Qyrǵyzstan astanasyna uıymǵa qatysýshy-memleketter Armenııa, Belarýs, Qazaqstan, Qyrǵyzstan, Reseı jáne Tájikstan Parlamentterimen qatar, UQShU PA baqylaýshy mártebesine ıe Aýǵanstan men Serbııa elderi ókilderi jınaldy.
Jıynǵa qatysýshylar uıymnyń aımaqtyq qaýipsizdik salasy boıynsha máselelerdi talqylap, aldaǵy is-qımyl josparlardy ortaǵa saldy.
Májilis tóraǵasy Nurlan Nyǵmatýlın Qazaqstannyń Tuńǵysh Prezıdenti - Elbasy Nursultan Nazarbaevtyń rólin alǵa tarta kelip, elimizdiń beıbitshilik pen qaýipsizdik jolyndaǵy bastamalaryna toqtaldy. Onyń pikirinshe, qaýipsizdikti nyǵaıtýda parlamenttik dıplomatııanyń róli zor.
Nurlan Nyǵmatýlın 23-24 qyrkúıekte Nur-Sultan qalasynda «Úlken Eýrazııa. Dıalog. Senim. Áriptestik» taqyrybynda ótetin Eýrazııa elderi parlamentteri spıkerleriniń IV keńesi búkil eýrazııalyq keńistik ıgiligi men turaqty damý múddesi jolyndaǵy kóp qyrly yntymaqtastyqtyń ózekti máseleleri boıynsha tıimdi tájirıbe almasýǵa múmkindik beretindigin atap ótti.
«Atalǵan forým Qazaqstannyń Tuńǵysh Prezıdenti - Elbasy Nursultan Nazarbaevtyń eýrazııalyq ıdeıasynyń 25 jyldyǵyna arnalǵan. Ózderińizge belgili, «eýrazııalyq ıntegratsııa» ıdeıasyn alǵash ret Nursultan Ábishuly 1994 jyly Máskeý memlekettik ýnıversıtetinde jarııalaǵan bolatyn», - dedi Májilis Spıkeri.
UQShU Parlamenttik Assambleıasynyń Keńesinde halyqaralyq yntymaqtastyq jáne saıası másele jónindegi UQShU PA turaqty komıssııasy tóraǵasy men tóraǵa orynbasarynyń kandıdatýrasy bekitildi.
Qatysýshylar 2019 jyly UQShU Qyrǵyzstannyń tóraǵalyǵy boıynsha basymdyqtardy júzege asyrýǵa arnalǵan aqparattardy tyńdady.
Sonymen birge, Keńes UQShU PA kezekti jazǵy sessııasyna UQShU memleketteri parlamenttik delegatsııalarynyń qatysý boıynsha (5-9 shilde, 2019 jyl, Lıýksembýrg) mindetterdi anyqtady. Sondaı-aq, 2019 jylǵa arnalǵan jumys josparlary pysyqtaldy.
