Nyǵmatýlın: Basty maqsat – aýyldy sapaly jáne qoljetimdi ınternetpen qamtý

NUR-SULTAN. QazAqparat - Búgin Májilis Spıkeri Nurlan Nyǵmatýlınniń tóraǵalyǵymen jalpy otyrys ótti. Onda depýtattardyń ózderi bastamashy bolǵan aýyldy sapaly ınternetpen qamtý týraly zań jobasy birinshi oqylymda maquldandy, dep habarlaıdy tómengi palatanyń baspasóz qyzmeti.

Atalǵan zań jobasynda eldimekenderdi uıaly baılanyspen qamtyp, jeliniń sapasyn arttyrý úshin baılanys operatorlaryna telekommýnıkatsııalyq ınfraqurylymdy birlesip paıdalaný usynylady.

Osy jóninde Májilis Tóraǵasy Nurlan Nyǵmatýlın: «Elimizdiń tsıfrlyq damý jolynda ınternet máselesiniń basty nazarda ekenin ózderińiz jaqsy bilesizder. Ásirese, aýyldy jerlerdi sapaly ınternetpen qamtamasyz etý — búgingi kúnniń basty talaby. Sebebi, Memleket basshysy Qasym-Jomart Toqaev Ulttyq keńes otyrysynda bilim jáne densaýlyq salalaryn zamanǵa saı reformalaý týraly aıtqan bolatyn. Osy jolda, árıne, tsıfrlyq jáne elektrondyq qyzmetterdiń qajettiligi óte mańyzdy», - dedi.

Nurlan Nyǵmatýlın atap ótkendeı, osy zań jobasy aýyl turǵyndaryn sapaly jáne qoljetimdi ınternetpen qamtamasyz etýge jańa serpin beretini sózsiz.

Jalpy, bul qujat aýyldyq eldimekenderdi ınternetke keńjolaqty qoljetimdilikpen qamtamasyz etý maqsatynda ázirlengen.

Sonymen qatar, baılanys obektilerin salý kezinde jer ýchaskelerin resimdeý boıynsha ruqsat berý rásimderin ońaılatýǵa jáne baılanys operatorlarynyń barlyǵyna telekommýnıkatsııalyq ınfraqurylymǵa teń qol jetkizý múmkindigin berýge baǵyttalǵan.