Nyǵmatýlın Bakýdegi TúrkPA sharalaryna qatysýda

BAKÝ. QazAqparat - QR Májilis tóraǵasy Nurlan Nyǵmatýlın bastaǵan Qazaqstannyń parlamenttik delegatsııasy Ázerbaıjan astanasy Bakýde ótip jatqan Túrkitildes memleketterdiń Parlamenttik Assambleıasynyń sharalaryna qatysyp jatyr, dep habarlaıdy «QazAqparat» HAA menshikti tilshisi.

Parlamentshiler kezdesýiniń negizgi oqıǵalarynyń biri QR Prezıdenti Nursultan Nazarbaevtyń bastamasymen qurylǵan uıymnyń jańa keńsesiniń ashylýy boldy. Sapar barysynda qazaqstandyq delegatsııa basshysy Ázerbaıjan, Qyrǵyzstan jáne Túrkııa parlamentiniń spıkerlerimen ekijaqty kezdesý ótkizdi. N.Nyǵmatýlın Túrkııanyń Uly ulttyq jınalysynyń basshysy Ismaıl Kahramanmen kezdesýdi Stambul jáne Kaıserı qalalaryndaǵy lańkestikten qaza tapqandardyń januıalaryna kóńil aıtýdan bastady. Ol eki el arasyndaǵy jańa tarıhı qarym-qatynastyń joǵary deńgeıin atap ótti jáne Túrkııa Prezıdenti Rejep Taıyp Erdoǵannyń 2015 jyly Qazaqstanǵa kelgen memlekettik saparynyń jáne 2016 jyldyń sáýir jáne tamyz aılarynda Qazaqstan Prezıdenti Nursultan Nazarbaevtyń Túrkııaǵa saparynyń mańyzdylyǵyna basa nazar aýdardy.

Óz kezeginde I.Kahraman elimizdiń bıylǵy TúrkPA tóraǵalyǵynyń nátıjelerin joǵary baǵalady jáne búgingi qaýip-qaterlerler jaǵdaıyndaǵy parlamentshiler dıalogy alańynyń keleshegi mol ekenin atap ótti. Odan bólek, Sırııadaǵy qaqtyǵysty retteý boıynsha kelissózderdi Astanada júrgizý máselesi qozǵaldy. Túrkııa parlamentiniń spıkeri Astananyń bitimgershilik máselesinde aıryqsha ról atqaratynyn aıtty.

Kezdesý sońynda N. Nyǵmatýlın áriptesin Qazaqstanǵa resmı saparmen kelýge shaqyrdy. Ázerbaıjan Mıllı Mejlısiniń tóraǵasy Oktaı Asadovpen jáne Qyrǵyzstan Jogorký Keneshiniń Spıkeri Chynybaı Týrsýnbekovpen parlamentaralyq baılanystardy nyǵaıtýǵa serpin berý arqyly, baýyrlas memleketterdiń yntymaqtastyǵyn tereńdetýdiń ózekti máselelerin talqylady.