Nyǵmatýlın: Árkim óz salasynda jumys istemegendikten zań jobasyna olqy normalar engiziledi
Salyq kodeksine engiziletin ózgerister jaıly Ekologııa, geologııa jáne tabıǵı resýrstar mınıstri Maǵzum Myrzaǵalıev baıandap, eń ozyq tehnologııasy bar kásiporyndardy emıssııalyq tólemderden bosatýdy usynǵan bolatyn.
Zań jobasyn talqylaý barysynda depýtat Artýr Platonov Qarjy vıtse-mınıstri Berik Sholpanqulovqa suraq qoıdy.
«Zań jobasyna sáıkes memlekettik kirister organdary qorshaǵan ortaǵa keltirilgen zııan boıynsha emıssııalyq tólemge baqylaý júrgizýge mindettelgen. Alaıda qazirgi zańnamaǵa sáıkes bul fýnktsııalar sizderde joq. Sizderdiń vedomstvolaryńyz qorshaǵan ortaǵa keltirilgen jaǵymsyz saldar úshin alynatyn tólemniń ákimshilendirýin qalaı júrgizedi? Sizderde ekologııa salasyndaǵy maman da, emıssııany ornynda tekserý múmkindigi de joq qoı», - dedi depýtat.
Suraqqa jaýap bergen Berik Sholpanqulov bul jumys ýákiletti organdarmen birge júrgiziletinin málim etti.
«Ýákiletti organdar taǵaıyndaǵan aıyppuldar negizinde memlekettik kirister komıteti ol qarajattyń bıýdjetke túsýin qadaǵalaıdy», - dedi ol.
Qysqa jaýapqa qanaǵattanbaǵan Parlament Májilisiniń tóraǵasy Nurlan Nyǵmatýlın Platonovtyń suraǵy basqasha qoıylǵanyn eskertti.
«Qandaı da bir emıssııa boıynsha jumystyń atqarylýyn kim taldaıdy? Suraq osynda. Búgin biz osy otyrysta mundaı máselemen betpe-bet keldik. Álbette árkim óz salasynda jumys istemegendikten osyndaı másele týyndaıdy. Mysaly aýyl sharýashylyǵyna kelgen álgi maman (aldyńǵy suraq boıynsha otyrysqa qatysqan vıtse-mınıstr Rýslan Manataevqa qarata) bankterde jumys istepti. Aýyl sharýashylyǵy salasynda bir kún de istemepti. Sońynda zań jobasynda osyndaı olqylyqtar engiziledi. Bireý búgin zań jobasyn oqymadyq dep kelipti. Oqyǵany bylaı tursyn, oqysa da túsinbeıdi. Bir kún aýylda bolǵan joq. Másele osynda», - dedi ol.
