Nyǵmatýlın Almaty oblysy halqyna Joldaýdyń basym baǵyttaryn túsindirdi
ASTANA. QazAqparat - QR Parlamenti Májilisiniń tóraǵasy Nurlan Nyǵmatýlın Almaty oblysyna jumys saparymen baryp, «Aluminum of Kazakhstan» JShS jumysshylarymen kezdesti, dep habarlaıdy tómengi palatanyń baspasóz qyzmeti.
Júzdesý barysynda Májilis tóraǵasy Elbasynyń bılik tarmaqtary arasynda ókilettikterdi qaıta bólý týraly Úndeýi men jyl saıynǵy dástúrli Joldaýy jaıynda baıandady.
Nurlan Nyǵmatýlın atap ótkendeı, bul eki qujat shyn máninde Qazaqstanymyzdyń aldaǵy damý jolynyń strategııalyq Jospary. Usynylyp otyrǵan basqarý reformasy Elbasynyń bolashaqty oılaıtyn, dana saıasatynyń taǵy bir naqty kórsetkishi.
Sonymen birge, bul Prezıdenttiń demokratııalyq ustanymdy kúsheıtý jolyndaǵy tarıhı sheshimi.
Al, Elbasynyń «Qazaqstannyń úshinshi jańǵyrýy: jahandyq básekege qabilettilik» Joldaýy elimizdiń tarıhı belesin bastaǵan óte mańyzdy qujat.
«Onda Elbasymyz Qazaqstan damýynyń jańa baǵyttaryn belgilep berdi. Ásirese, ulttyq ekonomıkany kóterýge erekshe kóńil bóldi. Bul eń aldymen halyqtyń áleýmettik jaǵdaıyn kúsheıtýge yqpal etedi», - dedi Májilis tóraǵasy.
Odan ári palata spıkeri Joldaýdyń árbir basymdyqtaryna, bolashaq maqsattarǵa toqtaldy. Ony júzege asyrýǵa belsene qatysý árbir qazaqstandyqtyń abyroıly mindeti ekenin aıtty.
Óz kezeginde zaýyt jumysshylary da Elbasynyń strategııalyq bastamalaryn tolyqtaı qoldaıtyndyǵyn bildirdi.
«Aluminium of Kazakhstan» JShS - alıýmınıı profılderin óndiretin tolyq tsıkldi joǵary tehnologııalyq zaýyt. Zaýyt quıý tsehinen, 1540 jáne 2400 qysqa tonnaǵa arnalǵan eki presten turady. Zaýyttyń jalpy aýdany shamamen 14 000 m2 quraıdy. Tehnologııalyq úderis bastapqy alıýmınııdi óńdeý arqyly daıyn ónimniń 280 ataýynan astamyn óndirýge múmkindik beredi. Zaýyt jylyna 12 000 tonnaǵa deıin ónim shyǵarady.
Kezdesý barysynda Májilis Spıkeri jınalǵandardyń suraqtaryna jaýap berip, aýqymdy máseleler boıynsha pikir almasty.
Aıta keteıik, Májilis depýtattary Joldaýdyń maqsat-mindetin halyqqa jetkizý, túsindirý, nasıhattaý maqsatynda aımaqtardy aralap, tek oblys ortalyqtaryn ǵana emes, árbir aýyldy, shalǵaıdaǵy eldi mekenderdi de qamtýda.
