Nyǵmatýlın áleýmettik zertteýlerge jumsalatyn mıllıardtaǵan qarjyny tekserýdi usyndy

ASTANA. QazAqparat - Parlament Májilisiniń tóraǵasy Nurlan Nyǵmatýlın memlekettik organdar tarapynan bıýdjet qarajatynyń orynsyz paıdalanylýyn synǵa aldy, dep habarlaıdy QazAqparat tilshisi.

Búgin tómengi palatada «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» Qazaqstan Respýblıkasynyń zańynyń jobasy talqylandy. Onyń barysynda Nurlan Nyǵmatýlın áleýmettik zertteýler men konsaltıngke qosymsha qarajat bólý qanshalyqty tıimdi degen máseleni qozǵady. 

«Áleýmettik zertteý jumystary men konsaltıngilik qyzmetter máselesi retteýdi qajet etedi. Mine, qarańyz, 2018 jylǵa arnalǵan bıýdjetke áleýmettik zertteý jumystaryn júrgizý úshin 17 memlekettik organ qazirgi deıin 7,2 mlrd teńge salǵan. Búgingi aıqyndalǵan bıýdjette áleýmettik zertteýler úshin taǵy da 3,3 mlrd teńge qarastyrylyp otyr», - dedi Májilis tóraǵasy.

Nurlan Nyǵmatýlın birqatar kórsetkishter men jaǵdaılardy salystyryp kórýdi usyndy.

«Dál osy bıýdjette múgedekterdi baǵatyn adamdarǵa bólinetin járdemaqy úshin 2,7 mlrd teńge qarastyrylýda. Jýyqta ǵana bolyp ótken sý tasqyndaryna baılanysty ІІM qazir osy baǵytta 1,6 mlrd teńge bólgeli otyr. Bizde áleýmettik zertteý salasynda sý tasqyndarynan da zor tótenshe jaǵdaı týyndap otyr ma?», - dedi ol.

Nurlan Nyǵmatýlınniń aıtýynsha, ótken jyly BǴM úshin bıýdjetten áleýmettik zertteýlerge dál osyndaı soma - 1,3 mlrd teńge bólingen.

«Basynda 770 mln teńge bólinedi de, aıqyndalý kezinde taǵy 540 mln teńge qosylady. Meniń oıymsha, sizder buǵan jospar sekildi qaraıtyn sekildisizder. Osyndaı zertteýlerdi qoldaný bylaı tursyn, joq degende baǵalaýǵa bolarlyq bolsa kim oǵan qarsy shyǵar edi? Mine tyńdańyzdar: "Qazirgi Qazaqstannyń jańǵyrtylýy jaǵdaıynda memlekettik kommýnıkatıvtik saıasatty sarapshylyq-analıtıkalyq qoldaý". Bul zertteý sonda qandaı máseleni sheshedi? Úlken suraq. Osyǵan qaramastan, mınıstrlik osy zertteý úshin 0,4 mlrd teńge suraıdy. Mundaı úlgilerdi tek osy mınıstrlikten ǵana emes, ózgelerden de baıqaýǵa bolady. Eger memlekettik organdardy tekseretin bolsaq, ondaı mysaldar jetip jatyr», - degen Nurlan Nyǵmatýlın osy máselege Esep komıtetine nazar aýdarýdy surady.