NVO sarapshysy: Djeıkobs Golovkınmen jekpe-jekke shyqsa, qyrýar paıda tabady
ASTANA. QazAqparat - Boks kórsetilimderi kezinde ótkir syn aıta bilýimen tanymal NVO sarapshysy Garold Lederman WBA nusqasy boıynsha álemniń «qarapaıym» chempıony Denıel Djeıkobs (31-1, 28 KO) álemge tanylý, sondaı-aq boks tarıhynda óz esimin qaldyryp ketý múmkindiginen aıyrylyp otyr dep sanaıdy. Bul týraly Sports.kz habarlaıdy.
Telekommentatordyń aıtýynsha, bunyń sebebi qarapaıym: amerıkalyq boksshy orta salmaqtaǵy (72,6 kelige deıin) kóshbasshy Gennadıı Golovkınmen (34-0, 31 KO) 23 sáýirge josparlanǵan jekpe-jekke shyǵýǵa asa nıet tanytpaı otyr. Onyń ornyna qazaqstandyq boksshy bokstyń kóptegen jankúıerleriniń kóńilinen shyǵa qoımaıtyn Domınık Ýeıdqa (18-0, 12 KO) qarsy shyǵady.
«Dennı Djeıkobs qaıda? Ol úzdiktermen judyryqtasqysy keletinin jaı ǵana aıtady. Biraq bul rette GGG-men jekpe-jekke shyqqysy kelmeıdi. Eger ony qalasa, 23 sáýirde Brýklındegi rıngke shyǵatyn edi. Bul tamasha jekpe-jek bolatyn edi!», - dep jazdy Lederman.
Eske sala keteıik, Djeıkobs NVO-men burynnan is júrgizbeıtin boks fýnktsıoneri El Heımonmen kelisimshart ornatqan. Heımonnyń sportshylary Premier Boxing Champions jobasynyń aıasynda túrli tegin arnalarda shyǵyp júr. Aıta keteıik, Dennıdiń sońǵy bolǵan jekpe-jegin NVO-nyń aýdıtorııa úshin únemi básekelesi Showtime arnasy kórsetken.
«Mindettemeler men barlyq saıasatty qoıa turyp, aqsha bar jerge barý kerek. Dennı Golovkınmen judyryqtasýdan mıllıondar tabady, al eger ony jeńse, orta salmaqtyń naǵyz chempıony atanady. Djeıkobs 23 sáýirde Barclays Center-da Gennadııdi jeńse, onyń aty ańyzǵa aınalady», - dep Djeıkobsqa keńes berdi sarapshy.
