Nvidia jasandy ıntellektige arnalǵan qaýipsizdik júıesin tanystyrdy
ASTANA. KAZINFORM — Nvidia jasandy ıntellekt agentteriniń derekter men túrli júıelerge qoljetimdiligin baqylaıtyn qaýipsizdik platformasyn tanystyrdy. Jańa júıe belgilengen shekteýler buzylǵan jaǵdaıda JI agentin birneshe mıllısekýnd ishinde oqshaýlaýǵa múmkindik beredi, dep habarlaıdy Euronews.
Nvidia Open Agent Safety Platform platformasyn qazirdiń ózinde 100-den astam uıym paıdalanyp jatyr nemese ony ázirleý jumystaryna qatysyp keledi. Olardyń qatarynda Anthropic, SpaceXAI jáne JPMorgan Chase bar.
Bul tehnologııany jasandy ıntellekt agentteri qoldanylatyn baǵdarlamalyq jáne apparattyq júıelerde, esepteý ınfraqurylymynda jáne robototehnıkada paıdalanýǵa bolady. Platforma mundaı júıelerdiń áreketterin baqylap, olardyń resýrstarǵa qoljetimdiligin shekteýge arnalǵan.
— Jasandy ıntellekttiń qoǵam úshin orasan zor áleýeti onyń qaýipsizdigi máselesin sheshe alǵan jaǵdaıda ǵana júzege asady, — dedi Nvidia kompanııasynyń negizin qalaýshy ári bas dırektory Djensen Hýang.
Platforma eki quraldan turady: OpenShell jáne Sentry
OpenShell ortalyq protsessorda (CPU) jumys istep, JI áreketterine belgilengen shekteýlerdiń saqtalýyn qamtamasyz etedi. Nvidia málimetinshe, bul qural kompanııanyń JI agentterine arnalǵan mindetterge beıimdep ázirlegen Vera protsessoryna ońtaılandyrylǵan. Sonymen qatar ony basqa óndirýshilerdiń protsessorlaryna da beıimdeýge bolady.
Sentry qosymsha apparattyq qorǵanys deńgeıi retinde jumys isteıdi. Ol Nvidia-nyń jeke chıpinde iske qosylyp, baǵdarlamalyq shekteýlerdi aınalyp ótken JI áreketterin baqylaıdy.
Kompanııalar platformany qalaı paıdalanady?
Anthropic Nvidia kompanııasymen birge Claude júıesiniń korporatıvtik nusqasyna arnalǵan qosymsha qaýipsizdik tetikterin ázirlep jatyr. Bul tehnologııalar kompanııalarǵa jasandy ıntellekt agentteriniń derekter men ishki júıelerge qoljetimdiligin shekteýge múmkindik beredi.
SpaceX-tiń jasandy ıntellekt baǵytynda jumys isteıtin SpaceXAI bólimshesi platformany Cursor baǵdarlamalaý agentteri men Grok modelderinde qoldanyp jatqanyn málimdedi.
Salesforce OpenShell quralyn Slack platformasyna biriktirdi. Bul qyzmetkerlerge JI áreketterin baqylap, olardyń ókilettikterin keńeıtý týraly suraýlardy maquldaýǵa nemese qabyldamaýǵa múmkindik beredi.
JPMorgan Chase pen Citi Nvidia kompanııasymen birge ashyq bastapqy kodqa negizdelgen jasandy ıntellektige arnalǵan qaýipsizdik tehnologııasyn ázirlep jatyr.
Nvidia platformany ne úshin tanystyrdy?
Jańa júıeniń ázirlenýi JI agentteriniń belgilengen shekteýlerdi aınalyp óte alǵanyn kórsetken birneshe jaǵdaıdan keıin qolǵa alyndy.
Shildede OpenAI kompanııasy modelderiniń biriniń jasyryn osaldyqty paıdalanyp, baqylaýdaǵy testileý ortasynan shyǵyp, Hugging Face platformasynyń serverlerine qol jetkizgenin habarlady.
Anthropic te synaq kezinde óziniń modeliniń úsh uıymnyń júıelerine ruqsatsyz qol jetkizgenin málimdegen.
Nvidia kompanııasy mundaı jaǵdaılar jasandy ıntellekt júıelerin birneshe deńgeıde qorǵaýdyń qajettigin kórsetedi dep sanaıdy. Kompanııanyń pikirinshe, JI agentteri tikeleı qoldanbalardyń ishinde belgilengen shekteýlerdi aınalyp óte alady. Sondyqtan olardyń áreketterin baqylaý ártúrli deńgeıde, sonyń ishinde arnaıy apparattyq mehanızm arqyly júzege asyrylýy kerek.
Aıta keteıik, OpenAI kompanııasy ChatGPT paıdalanýshylarynyń 53 sýreti JI agentteri arqyly tarap ketkenin málimdedi.
