NVIDIA jáne AMD Qytaıǵa jóneltilimderdi jalǵastyra alady

ASTANA. KAZINFORM — AQSh-tyń Nvidia jáne AMD kompanııalary Qytaıǵa ozyq jasandy ıntellekt chıpterin jetkizýdi qaıta jalǵastyra alady, biraq bul satylymdardan túsken tabystyń 15%-yn AQSh bıýdjetinen aýdarý shartymen júzege asady, dep habarlaıdy Reuters.

AQSh Saýda mınıstrligi qazirdiń ózinde Qytaıǵa chıp eksporttaýǵa lıtsenzııalar bere bastady. Bul eksportqa tyıymdy AQSh prezıdenti Donald Tramptyń ákimshiligi bıyl sáýirde engizgen bolatyn. Ótken aıda Nvidia Vashıngtonnyń jetkizýdi qaıta bastaýǵa ruqsat berýdi josparlap otyrǵanyn habarlaǵan edi.

Eksporttyq shekteýler engizilgennen keıin Nvidia kompanııasy Qytaıǵa chıp jetkize almaý tabystyń 8 mlrd dollarǵa azaıýyna ákelýi múmkin ekenin eskertti. Al AMD korporatsııasy bıylǵy tabystyń 1,5 mlrd dollarǵa tómendeýin boljap otyr.

Sarapshylardyń aıtýynsha, jańa salyq alymy kompanııalardyń paıdasyn azaıtýy yqtımal. Bul dúısenbi kúngi aldyn ala saýda barysynda-aq baıqaldy: Nvidia aktsııalary 1%-ǵa, al AMD aktsııalary shamamen 2%-ǵa tómendedi.

Saýda shekteýleriniń jumsarǵanyna qaramastan, Qytaıǵa jetkizýge ruqsat etilgen jartylaı ótkizgishterdiń tizimi áli de shekteýli bolyp qala beredi. AQSh-tyń ulttyq qaýipsizdigine baılanysty kompanııalar Qytaıǵa eń qýatty jáne zamanaýı jasandy ıntellekt chıpterin sata almaıdy.

Buǵan deıin AQSh pen Qytaı arasyndaǵy tarıftik soǵystyń Qazaqstanǵa yqpaly týraly jazǵan bolatynbyz.