Nvidia qytaılyq chat-bot kesirinen shamamen 600 mlrd dollar joǵaltty

ASTANA. KAZINFORM — Qytaılyq DeepSeek-R1 chat-botynyń naryqta paıda bolýy amerıkalyq mıkrochıp óndirýshi Nvidia-ny 27 qańtardaǵy bir saýda kúniniń sońyndaǵy jaǵdaı boıynsha 600 mlrd dollarǵa jýyq shyǵynǵa túsirdi, dep habarlaıdy VVS. 

Jasandy ıntellektti damytýmen aınalysatyn basqa tehnologııalyq alpaýyttar odan da kóp ondaǵan mıllıard dollar joǵaltty. 

Kúnniń sońyna qaraı Nvidia aktsııalarynyń quny 16,9%-ǵa nemese jalpy $589 mlrd-qa tómendedi. 

Nvidia básekelesi Broadcom kompanııasy 17,4% nemese shamamen 200 mlrd dollar shyǵynǵa ushyrady.

Microsoft aktsııalarynyń baǵasy bir kúnde 2,14%-ǵa (shamamen 70 mlrd dollar, biraq áli $3,23 trln dollar qaldy), al Google ıesi Alphabet aktsııalary 4%-ǵa (95 mlrd dollar) arzandady.

AQSh-tyń Nasdaq100 tehnologııalyq kompanııalarynyń ındeksi 3%-ǵa jýyq tómendedi.

Amerıkalyq kompanııalar jasandy ıntellekt júıelerin damytýǵa júzdegen mıllıard dollar ınvestıtsııalady jáne oǵan taǵy qarajat quıýdy josparlap otyr. Al qytaılyq DeepSeek kompanııasy óziniń chat-botyn nebári 5,6 mln dollarǵa jasap, oqytqanyn sendirip otyr.

Buǵan deıin Ulybrıtanııa jasandy ıntellekt salasynda sýperderjava mártebesin alýdy maqsat etip otyrǵanyn jazdyq.