Nvidia Hugging Face platformasyn 13 mlrd dollarǵa satyp alady
ASTANA. KAZINFORM – Nvidia jasandy ıntellekt modelderin ázirleýshiler men paıdalanýshylardy biriktiretin Hugging Face platformasyn shamamen 13 mlrd dollarǵa satyp alý týraly kelisimge keldi, dep habarlaıdy AP.
Kompanııanyń baqylaýyna ótkennen keıin de Hugging Face ashyq platforma retinde jumysyn jalǵastyrady. Paıdalanýshylar jasandy ıntellekt modelderin júktep, taratyp jáne óz qajettilikterine qaraı beıimdeı alady.
Nvidia prezıdenti Djensen Hýang kompanııa ashyq bastapqy kody bar jasandy ıntellekt tehnologııalaryna qyzyǵýshylyq odan ári artady dep esepteıtinin málimdedi.
– Ashyq tásil kompanııalarǵa jabyq jasandy ıntellekt servısterine aqy tóleýdiń ornyna daıyn modelderdi paıdalanyp, olardy óz mindetterine beıimdeýge múmkindik beredi. Biz aldaǵy ýaqytta uıymdardyń kóbi ashyq modelderdi tańdaıdy dep esepteımiz, – dedi Djensen Hýang.
Nvidia OpenAI jáne Anthropic sekildi kompanııalardyń jabyq sheshimderine balama retinde ashyq modelderge suranys artady dep boljap otyr.
Kelisim jasandy ıntellekt qaýipsizdigine qatysty alańdaýshylyq kúsheıgen tusta jasalyp otyr. AQSh Prezıdenti Donald Tramp eń ozyq jasandy ıntellekt júıeleriniń ulttyq qaýipsizdikke tóndirýi múmkin táýekelderin tekserý tetigin qurý týraly jarlyqqa qol qoıǵannan keıin bir aıdan soń JI platformalaryna birqatar shabýyl jasalǵan.
Tramptyń jarlyǵynda asa qýatty jasandy ıntellekt júıeleri kópshilikke usynylǵanǵa deıin bir aı ishinde olardyń yqtımal qaýipterin baǵalaý qarastyrylǵan.
Hugging Face platformasyn satyp alý Nvidia-nyń baǵdarlamalyq qamtamasyz etý jáne ashyq jasandy ıntellekt tehnologııalary salasyndaǵy pozıtsııasyn kúsheıtedi. Qazir kompanııa zamanaýı JI modelderin oqytý men iske qosýǵa arnalǵan chıpter naryǵynda jetekshi orynǵa ıe.
Aıta keteıik, NVIDIA JI jelilerin jedeldetý úshin Marvell-ge 2 mıllıard dollar ınvestıtsııalaıdy.
