NVIDIA Ekibastuzdaǵy DÓO alqaby týraly maqala jarııalady
ASTANA. KAZINFORM — Amerıkalyq NVIDIA tehnologııalyq kompanııasy Qazaqstannyń jasandy ıntellektini damytýǵa qajetti esepteý qýatyn arttyrý baǵytyndaǵy jobalar týraly materıal jarııalady. Onda osy saladaǵy negizgi bastamalardyń qatarynda «Qazaqtelekom» AQ, Firebird AI kompanııasy jáne Ekibastuzdaǵy DÓO alqaby jobasy atalǵan.
Materıal NVIDIA GTC Berlin 2026 konferentsııasyna arnalǵan jarııalanymdar toptamasynda shyqty.
23 qazanda NVIDIA negizin qalaýshy ári bas dırektory Djensen Hýang Qazaqstanǵa alǵash ret keldi. Astanada ol elimizdiń jasandy ıntellekt ekojúıesiniń damýymen tanysyp, stýdenttermen jáne tehnologııalyq startap ókilderimen kezdesti.
NVIDIA málimetinshe, Qazaqstannyń iri telekommýnıkatsııalyq kompanııasy — «Qazaqtelekom» Astanada jáne Almatyda 400 NVIDIA H200 grafıkalyq protsessory men 480 NVIDIA B300 grafıkalyq protsessoryn iske qosqan.
Kompanııa 2027 jyly Ekibastuz óńirindegi Data Center Valley derekter ortalyqtary klasterine 1 000-nan astam grafıkalyq protsessor ornatýdy josparlap otyr. Buǵan qosa, osy óńirde NVIDIA Vera Rubin jańa býynynyń myńnan astam grafıkalyq protsessoryn ornalastyrý kózdelgen. Bul ınfraqurylymdy kásiporyndar, baǵdarlamalyq ónim ázirleýshiler men ǵylymı uıymdar paıdalana alady.
NVIDIA ókilderiniń baǵalaýynsha, Qazaqstannyń jasandy ıntellekt ekojúıesi jospardan naqty iske kóshý kezeńine ótti. Bul ózgeris esepteý ınfraqurylymyn qurýdan bastap, tildik modelder men qoldanbaly servısterdi damytýǵa deıingi baǵyttardy qamtıdy.
Kompanııanyń pikirinshe, jasandy ıntellekt salasyndaǵy áleýet tek grafıkalyq protsessorlar sanymen ólshenbeıdi. Mundaı ınfraqurylymnyń startaptarǵa, ýnıversıtetterge, zertteýshiler men óndiris oryndaryna qanshalyqty qoljetimdi bolýy da mańyzdy.
Bul baǵyttaǵy negizgi jobalardyń biri — Ekibastuzda salynyp jatqan Data Center Valley derekter ortalyqtary klasteri. Bolashaqta onyń energetıkalyq qýatyn 1 GVt-qa deıin jetkizý josparlanǵan. «Qazaqtelekom» AQ basqarma tóraǵasy Baǵdat Mýsın jobany Djensen Hýangqa tanystyrdy. Ol klasterdiń ınfraqurylymdyq múmkindikteri men energetıkalyq artyqshylyqtaryn, sondaı-aq Qazaqstannyń joǵary ónimdi esepteýler boıynsha halyqaralyq ortalyqqa aınalý áleýetin túsindirdi.
Jobanyń birinshi kezeńine qarastyrylǵan 215 MVt qýattyń barlyǵy aldyn ala bólinip qoıylǵan. Qýaty 50 MVt bolatyn alǵashqy derekter ortalyǵyn 2027 jyldyń ekinshi toqsanynda iske qosý josparlanyp otyr.
— Búginde elderdiń jasandy ıntellekt salasyndaǵy básekege qabilettiligi algorıtmderdiń damýymen ǵana emes, óz esepteý ınfraqurylymynyń bolýymen de aıqyndalady. Sondyqtan Ekibastuzda Data Center Valley jobasyn júzege asyryp jatyrmyz. Bizdiń maqsatymyz — Qazaqstandy esepteý resýrstaryn tutynýshy elden jasandy ıntellektige qajetti qýattardy álemdik naryqqa usynatyn memleketterdiń birine aınaldyrý. Bolashaqtyń tehnologııalary Qazaqstanǵa syrttan kelip qana qoımaı, elimizde jasalyp, osynda damyǵanyn qalaımyz, — dedi Baǵdat Mýsın.
NVIDIA jarııalaǵan aqparatqa sáıkes, Firebird kompanııasy Qazaqstanǵa jetkizý úshin 45 myń NVIDIA Grace Blackwell grafıkalyq protsessoryn eksporttaýǵa AQSh lıtsenzııasyn alǵan.
Jobanyń alǵashqy kezeńi Data Center Valley aýmaǵynda «Qazaqtelekommen» birlesip júzege asyrylyp jatyr. Ony kommertsııalyq maqsatta iske qosý 2027 jyldyń úshinshi toqsanyna josparlanǵan.
Budan bólek, Firebird Qazaqstanda Firebird Labs Kazakhstan zerthanasyn ashýdy kózdeıdi. Ol jergilikti jasandy ıntellekt startaptary men zertteýshilerge qoldaý kórsetip, zamanaýı esepteý qýattaryna qol jetkizýge múmkindik bermek.
Jalpy, esepteý ınfraqurylymynyń damýy qazaqstandyq kásiporyndar, ǵylymı uıymdar men tehnologııa ázirleýshiler úshin jasandy ıntellekt modelderin ázirleý jáne qoldaný múmkindikterin keńeıtýge baǵyttalǵan.
Eske sala ketsek, Memleket basshysy Qasym-Jomart Toqaev NVIDIA kompanııasynyń negizin qalaýshy jáne prezıdenti Djensen Hýangty qabyldady.
NVIDIA basshysy Qazaqstandy Physical AI álemdik habyna aınaldyrýdy usyndy.
