NVIDIA basshysynyń Qazaqstanǵa sapary álemdik BAQ nazaryn aýdardy
ASTANA. KAZINFORM – NVIDIA kompanııasynyń bas dırektory Djensen Hýangtyń Qazaqstanǵa sapary halyqaralyq buqaralyq aqparat quraldarynda keńinen jarııalandy. Sheteldik basylymdar Qazaqstannyń jasandy ıntellekt ınfraqurylymyn damytý josparlaryna, energetıkalyq áleýetine jáne Qazaqstanmen baılanysty tehnologııalyq kompanııalarǵa nazar aýdardy.
Atap aıtqanda, amerıkalyq CNBC jáne Yahoo Finance basylymdary esepteý qýattaryn arttyrýǵa baǵyttalǵan aýqymdy jobalarǵa, sonyń ishinde Ekibastuzdaǵy Data Center Valley jobasyna toqtaldy. Al Gonkongte shyǵatyn South China Morning Post basylymy Qazaqstannyń energetıkalyq resýrstaryn jasandy ıntellekt ındýstrııasyn damytýdaǵy artyqshylyqtarynyń biri retinde atady. Maqalada Djensen Hýangtyń energııany eksporttap qana qoımaı, ony ıntellektýaldyq ónimder men esepteý qýattaryn damytýǵa paıdalaný mańyzdy ekeni týraly pikiri keltirilgen.
NVIDIA basshysy yqtımal ekonomıkalyq múmkindikterdiń aýqymy týraly da aıtty. Onyń baǵalaýynsha, qýaty 5 gıgavatt bolatyn esepteý klasterin qurý 250 mlrd dollarǵa deıin ınvestıtsııa tartýǵa jáne 1 trln dollar kóleminde ekonomıkalyq nátıje berýge múmkindik beredi.
Alaıda Djensen Hýangtyń Silk Way telearnasyna bergen túsiniktemesine súıensek, bul áleýetti iske asyrý úshin esepteý qýattaryn qurý jetkiliksiz. Qazaqstan energetıkalyq ınfraqurylymdy damytýy, derekterdi óńdeý ortalyqtarynyń qurylysyn jedeldetýi, NVIDIA tehnologııalaryn engizýi jáne óz mamandaryn daıarlaýy qajet.
Kompanııa basshysy bilim berý salasyna erekshe mán beredi. Onyń pikirinshe, bul baǵyt elge kúrdeli tehnologııalyq júıelerdi basqara alatyn ınjenerler men mamandardyń jańa býynyn daıarlaýǵa múmkindik beredi.
Qazaqstanǵa halyqaralyq nazardyń artýy derekterdi óńdeý ortalyqtaryn salý josparlarymen ǵana baılanysty emes. Eldiń tehnologııalyq bıznesine salynǵan ınvestıtsııalar da sheteldik basylymdardyń nazaryn aýdardy.
Bloomberg pen Variety basylymdary NVIDIA men TCV ınvestıtsııalyq kompanııasynyń jasandy ıntellekt kómegimen vıdeo jasaýǵa mamandanǵan Higgsfield startapyna ınvestıtsııa salǵanyn habarlady. Kompanııanyń Qazaqstanmen baılanysy bar, al ınjenerlik tobynyń edáýir bóligi Qazaqstanda jumys isteıdi.
Osylaısha, halyqaralyq aqparat keńistiginde Qazaqstan jasandy ıntellekt ınfraqurylymyn damytýǵa arnalǵan iri jobalardyń alańy retinde ǵana emes, sonymen qatar óz tehnologııalyq komandalary men jobalary qalyptasyp jatqan el retinde de tanyldy. Bul bastamalardyń ekonomıkalyq nátıjesi ınvestıtsııany, qoljetimdi energııa resýrstaryn, ınfraqurylymdy damytý men bilikti mamandar daıarlaýdy qanshalyqty tıimdi ushtastyrýǵa baılanysty bolady.
Búgin Qazaqstan Prezıdenti Qasym-Jomart Toqaev X áleýmettik jelisindegi paraqshasynda NVIDIA basshysynyń usynystarynyń praktıkalyq mańyzyn atap ótken jazbasyn jarııalady.
