NVIDIA basshysy Qazaqstandy Physical AI álemdik habyna aınaldyrýdy usyndy
ASTANA. KAZINFORM — NVIDIA jetekshisi Prezıdenttiń jańa ónerkásiptik revolıýtsııanyń bastapqy kezeńinde Qazaqstandy jasandy ıntellekt eli retinde órkendetý jónindegi strategııalyq maqsatyn joǵary baǵalady.
Bul bastama jasandy ıntellektini damytýǵa jáne ony keńinen engizýge baǵyttalǵan.
Budan bólek, kompanııa basshysy Qazaqstandy Physical AI álemdik habyna aınaldyrýdy usyndy.
— Jasandy ıntellektini damytý úshin, eń aldymen, mol qýat kózi, sondaı-aq ǵylym, matematıka men tehnologııa salalarynda bilim-biligi joǵary mamandar kerek. Osy baǵyttardyń árqaısysyn damytýǵa Qazaqstannyń áleýeti jetkilikti, — dedi Djensen Hýang.
Sondaı-aq ol NVIDIA kompanııasynyń elimizben yqpaldastyǵy aıasynda keıingi jyldary eleýli tabysqa qol jetkizilgenine, tehnologııalyq kompanııalarmen baılanystar nyǵaıa túskenine nazar aýdardy.
— Sońǵy jyly ózara qarym-qatynasymyz óte nátıjeli boldy. Biz qazaqstandyq, sonyń ishinde Firebird AI KZ Ltd jáne «Qazaqtelekom» kompanııalarymen seriktestik baılanystardy damyta bastadyq. Sonymen birge Qazaqstannyń alǵashqy tehnologııalyq syńarmúıizi sanalatyn Higgsfield kompanııasyna qoldaý kórsetemiz. Bul joba jahandyq tehnologııalyq ekojúıede oıyp turyp oryn aldy. Birge atqarǵan jumystarymyzǵa dán rızamyn. Bul biz eńseretin joldyń basy ǵana. Elińizdiń kompanııamyzben yntymaqtastyq ornatqanyna qýanamyn, — dedi kompanııa jetekshisi.
