Nvidia álemdegi eń qundy kompanııa atandy

ASTANA. KAZINFORM – Amerıkalyq chıp óndirýshi Nvidia kompanııasy aktsııalarynyń baǵasy joǵary deńgeıge kóterilip, álemdegi eń qundy kompanııa atandy. Fırmanyń jetistigi, eń aldymen, jasandy ıntellekt sektoryna bás tigý týraly sheshimimen baılanysty, dep habarlaıdy VVS. 

Seısenbi kúngi saýdanyń sońynda Nvidia aktsııalary shamamen 136 dollardy qurady, bul segiz jyl burynǵydan júz ese kóp.

Qazir kompanııanyń quny keshe keshke deıin ǵalamshardaǵy eń qundy kompanııalardyń álemdik reıtıngin basqarǵan Microsoft-tan da qymbat.

Maýsym aıynyń basynda Nvidia bul kórsetkish boıynsha Apple-di basyp ozyp, ony úshinshi orynǵa túsirdi.

Qazirgi ýaqytta naryq Nvidia-ny 3,34 trln dollarǵa baǵalaıdy, tek osy jyldyń aqpan aıynan bastap kompanııanyń quny bir jarym eseden astamǵa ósti.

Nvidia derbes kompıýterlerge arnalǵan grafıkalyq kartalardan basqa jasandy ıntellektti damytý jáne úıretý úshin qajetti kompıýterlik chıpterdi jasaıdy jáne onyń ónimderine suranys artýda – onymen birge satylymdar men paıda da ósip keledi.

Mamyr aıynda kompanııa aktsııalardy bólýdi júzege asyratynyn jarııalady. Basqasha aıtqanda, ol aktsııalardyń sanyn on ese arttyryp, sáıkesinshe qunyn tómendetedi.

Mamyr aıynyń sońynda Nvidia aktsııalary 1200 dollarǵa satyldy, bul shaǵyn ınvestorlar úshin óte úlken soma. Qazirgi baǵa boıynsha kompanııanyń aktsııalaryn kez kelgen adam satyp ala alady.