Nvidia 4,5 trln dollarlyq naryqtyq quny bar tuńǵysh kompanııa boldy
ASTANA. KAZINFORM — Seısenbi kúni grafıkalyq protsessorlardy ázirleýshi Nvidia aktsııalary 3%-ǵa jýyq ósip, jańa rekordqa jetti, nátıjesinde mıkroshemalar jasaýshynyń naryqtyq kapıtalızatsııasy 4,5 trln dollardan asty, dep habarlaıdy Kazinform.
Bul týraly Nasdaq derekteri kýálandyryp otyr.
Nvidia aktsııalary bir jyl ishinde shamamen 39%-ǵa ósti jáne ınvestorlardy tartýdy jalǵastyryp otyr, óıtkeni amerıkalyq kompanııa JI serpilisi jaǵdaıynda óz pozıtsııasyn nyǵaıtyp, mámile jasaý qarqynyn kúsheıtip keledi.
Ótken aptada Nvidia OpenAI-ǵa 100 mlrd dollarǵa deıin ınvestıtsııa salýǵa nıetti ekeni belgili boldy.
Kompanııalar OpenAI baǵdarlamalyq jasaqtamasy men ınfraqurylymdy damytýdyń jol kartalaryn, sondaı-aq NVIDIA apparattyq jáne baǵdarlamalyq qamtamasyz etýin birlesip ońtaılandyrady. Bul seriktestik OpenAI jáne NVIDIA kompanııasynyń Microsoft, Oracle, SoftBank jáne Stargate sııaqty keń aýqymdy seriktesterimen álemdegi eń ozyq JI ınfraqurylymyn qurýǵa baǵyttalǵan keń aýqymdy birlesken jobalaryn tolyqtyrady.
Birlesken jobanyń birinshi kezeńi 2026 jyldyń ekinshi jartysynda iske qosylady dep kútilip otyr.
Buǵan deıin NVIDIA kompanııasy men Intel korporatsııasy gıpermasshtabtaǵy, kásiporyndyq jáne tutynýshy naryqtarynda qosymshalar men jumys júktemelerin jedeldetetin derekter ortalyqtary men derbes kompıýterlerge arnalǵan tapsyrys ónimderiniń birneshe býyndaryn birlesip ázirleý boıynsha seriktestik týraly jarııalady.
Nvidia — 1993 jyly negizi qalanǵan grafıkalyq protsessorlaryn jáne basqa chıpterdi ázirleıtin amerıkalyq tehnologııalyq kompanııa. Onyń shtab-páteri Kalıfornııa shtatynyń Santa-Klara qalasynda ornalasqan. Kompanııanyń ázirlemeleri jasandy ıntellekt, beıne oıyndar jáne avtomobıl ındýstrııasynda keńinen qoldanys tapty.