Nurjas Sadyrbaev: Dımashtyń aldynda án aıtý ońaı emes

ASTANA. KAZINFORM – «Voice Beyond Horizon» halyqaralyq jobasynyń qatysýshysy, talantty ánshi Nurjas Sadyrbaev Dımash Qudaıbergenniń aldynda óner kórsetýdiń qanshalyqty qıyn bolǵanyn aıtyp berdi. 

Nurjas Sadyrbaevtyń aıtýynsha, álemdik deńgeıdegi ánshiniń aldynda onyń tól týyndysyn oryndaý erekshe sheberlikti talap etedi.

– Birinshiden, Dımash Qudaıbergenniń aldynda án salý óte qıyn, óıtkeni ol – álemdik tulǵa. Onyń ústine sahnada óziniń jazǵan ánin oryndadym. Saıystyń Qazaqstanda ótýi jaýapkershilik júgin tipti eseleı tústi. Kórermender «qazaqtyń balasy qaıda, qalaı aıtady eken?» dep qaraıdy. Sondyqtan uıatqa qaldyrmasam eken degen oıda boldym, - deıdi ol Jibek Joly telearnasynyń «Bugin LIVE» baǵdarlamasynda.

Ónerpaz alǵashqy aınalymda Dımashtyń repertýaryndaǵy kúrdeli shyǵarmanyń biri – «Samaltaý» ánin oryndaǵan. Dımash pıanınoda oınaǵan áýenine tánti bolǵan Nurjas, ony oryndaýǵa arnaıy ruqsat alǵan. Onyń aıtýynsha, bul án vokaldyq turǵydan óte aýyr ári úlken daıyndyqty qajet etedi.

Sahnalyq sheberlikten bólek, ánshi fızıkalyq daıyndyqqa da qatty kóńil bólgen.

– Únemi alysyp kele jatqan máselem – salmaǵym. Sondyqtan barynsha sportpen aınalysyp, az ýaqyttyń ishinde ózimdi qalypqa keltirýge tyrystym. Negizgi kedergilerdiń biri osy boldy, - dep atap ótti Nurjas Sadyrbaev.

Nurjastyń aıtýynsha, dodada osal qarsylas joq, bári de halyqaralyq saıystarda ysylǵan myqtylar.

Aıta keteıik, atalǵan jobaǵa álemniń 6 elinen kelgen 8 qatysýshy baq synaıdy.

Buǵan deıin Dımash Qudaıbergenniń «Voice Beyond Horizon» jobasy Túrkistanda kórsetilgenin habarlaǵan edik.