Nurjan Nurjigitov: Sý qaýipsizdigi úshin naqty birlesken tetikter qajet
ASTANA. KAZINFORM – QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, Dýshanbede «Turaqty damý úshin sý» halyqaralyq is-qımyl onjyldyǵyna arnalǵan (2018–2028 jj.) Joǵary deńgeıdegi tórtinshi halyqaralyq konferentsııa qarsańynda transshekaralyq yntymaqtastyq máseleleri boıynsha forým ótti.
Forým aıasynda transshekaralyq sý resýrstarynyń turaqtylyǵyna arnalǵan mınıstrlik dıalogy uıymdastyryldy.
Іs-sharaǵa Ortalyq Azııa elderiniń sý sharýashylyǵy vedomstvolarynyń basshylary qatysyp, transshekaralyq sý resýrstarynyń turaqtylyǵyn arttyrý, tsıfrlyq sheshimderdi engizý, klımattyń ózgerýine beıimdelý jáne ózen basseınderi deńgeıinde sý resýrstaryn basqarý tetikterin jetildirý máselelerin talqylady.
QR Sý resýrstary jáne ırrıgatsııa mınıstri Nurjan Nurjigitov óz sózinde Qazaqstannyń Ózbekstanmen birlesip Syrdarııa ózeni basseıninde sý esebin avtomattandyrý baǵytynda atqaryp jatqan jumysyna toqtalyp, mundaı sheshimderdi óńirlik deńgeıde odan ári ilgeriletýdiń mańyzyn atap ótti.
Sonymen qatar Qazaqstan Respýblıkasynyń Prezıdenti Qasym-Jomart Toqaev usynǵan BUU júıesi aıasynda Halyqaralyq sý uıymyn qurý bastamasynyń mańyzdylyǵy erekshe ataldy. Bul bastama halyqaralyq ózara is-qımyldy nyǵaıtýǵa jáne sý qaýipsizdigi salasynda álemdik qaýymdastyq kúshin biriktirýge baǵyttalǵan.
- Qazir tek máselelerdi talqylap qana qoımaı, naqty birlesken jumys tetikterin iske qosý mańyzdy. Ol úshin ortaq boljam jasaý, derektermen almasý, tsıfrlyq tehnologııalardy engizý jáne transshekaralyq sý basseınderin tıimdi basqarý júıesin qalyptastyrý qajet, – dedi Nurjan Nurjigitov.
«Turaqty damý úshin sý, 2018-2028 jyldar» halyqaralyq is-qımyl onjyldyǵyna arnalǵan Joǵary deńgeıdegi tórtinshi halyqaralyq konferentsııa aıasynda plenarlyq sessııa ótedi. Onda delegatsııa basshylarynyń baıandamalary men málimdemeleri tyńdalady. Qazaqstan delegatsııasyna Sý resýrstary jáne ırrıgatsııa mınıstri Nurjan Nurjigitov jetekshilik etip otyr.
Osyǵan deıin Ortalyq Azııa elderi jazǵy maýsymnyń basyna sýarmaly sý berý kestelerin bekitkeni týraly jazdyq.
