Nurjigitov: Reseı Jaıyqtan alatyn úlesimizdiń 50 paıyzyn ǵana berip keldi
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Májilistegi Úkimet saǵatynda Jaıyqtyń sýyn Reseımen birlesip paıdalaný kelisimderiniń jaı-kúıin baıandady.
— 2023 jyldan beri transshekaralyq ózenderdiń máselesine arnalǵan 80-nen astam kezdesý ótkizsek, sonyń 22-si Reseı tarabymen júrdi. 2016 jyly sol kezdegi Ekologııa jáne tabıǵı resýrstar mınıstrligi reseılik áriptesterimen arnaıy kelisimshartqa qol qoıǵan. 2019 jáne 2024 jyldary osy kelisimsharttyń merzimin uzartý boıynsha kelisimder jasaldy. Biraq 18 tarmaqtan turatyn kelisimsharttaǵy máseleniń bári ekologııaǵa ǵana baılanysty bolǵan. 2024 jyldyń jeltoqsan aıynda osy kelisimshartty taǵy 5 jylǵa uzarttyq, — dedi ol depýtat saýalyna jaýap bere otyryp.
Aıtýynsha, Reseı taraby keı jyly Qazaqstanǵa tıesili sýdyń teń jartysyn berip kelgen.
— Sý kólemine kelsek, 2019 jyly Jaıyq ózeninen eń tómen kólemde sý berilgen. Jalpy kelisim boıynsha jyl saıyn eń kem degende 7,8 mlrd tekshe metr sý alýymyz kerek. Al 2019 jyly 3,5 mlrd tekshe metr ǵana sý aldyq. Sondyqtan memleket basshylary tapsyrma berip, arnaıy jol kartasy ázirlengen. Jol kartasynyń aıasynda Jaıyqtyń boıyndaǵy sý qoımalary men bógetterin túgendeý kerek. Ol jol kartasynyń da merzimi uzartyldy, — dedi mınıstr.
Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.
Buǵan deıin Jaıyq ózenine erekshe memlekettik mártebe qashan beriletini aıtyldy.
Sondaı-aq Sý resýrstary jáne ırrıgatsııa mınıstri Nurjan Nurjigitov sýdyń zańsyz saýdasy tolyq joıylmaı turǵanyn moıyndady.