Nurjan Nurjigitov Eýropalyq qaıta qurý jáne damý bankiniń ókilderimen elimizdegi sý sharýashylyǵy júıesin talqylady
Sý resýrstary jáne ırrıgatsııa mınıstri Nurjan Nurjigitov Eýropalyq Qaıta qurý jáne Damý bankiniń Qazaqstandaǵy ókilderimen kezdesti, dep habarlaıdy Kazinform.
Atalǵan mınıstrliktiń málimetinshe, birinshi kezekte taraptar qoldanystaǵy Aqtóbe, Jambyl jáne Túrkistan oblystarynda sý sharýashylyǵy júıelerin rekonstrýktsııalaý jónindegi birlesken jobanyń merzimin 2025 jylǵa deıin uzartýdy talqylady.
Qazaqstandaǵy EQDB dırektory Hýseın Ozhan bank bul máseleni QR Úkimetiniń halyqaralyq qarjy uıymdarymen yntymaqtastyq jónindegi úılestirý keńesiniń qaraýyna shyǵarýǵa daıyn ekenin aıtty.
Sondaı-aq Nurjan Nurjigitov rekonstrýktsııa jumystarynyń ýaqytyly jáne sapaly oryndalýyn qamtamasyz etý úshin EQDB-men birlesken jobalardy basqarý jónindegi top qurýdy usyndy. Mınıstr mundaı toptar Dúnıejúzilik bankpen jáne Islam Damý Bankimen yntymaqtastyq aıasynda bar ekenin atap ótti.
Hýseın myrza óz kezeginde EQDB bul máselede QR Sý resýrstary jáne ırrıgatsııa mınıstrligimen yntymaqtasýǵa daıyn ekenin atap ótti.
«Іske asyrylyp jatqan jobalardyń nátıjesi jaıynda jumys tolyq aıaqtalǵannan keıin ǵana aıtýǵa bolady. Jumysty 50%-ǵa ǵana aıaqtap, oń nátıje kúte almaısyz. Sondyqtan qoldanystaǵy jobalardy tezirek aıaqtap, paıdalanýǵa berý kerek. Biz usynǵan Basqarý tobyn qurý jónindegi bastama osy baǵyttaǵy mańyzdy qadam bolady dep oılaımyn»,- dedi QR Sý resýrstary jáne ırrıgatsııa mınıstri Nurjan Nurjigitov
