Nurjan Nysanov bokstan Qazaqstan erler quramasynyń Azııa chempıonatyna daıyndyǵyn aıtyp berdi
ASTANA. KAZINFORM — Bokstan Qazaqstan erler quramasynyń bas bapkeri Nurjan Nysanov Mońǵolııanyń Ýlan-Bator qalasynda ótip jatqan 2026 jylǵy Azııa chempıonatyna daıyndyq barysy jóninde áńgimelep berdi.
Bul jóninde bas bapker Qazaqstan boks federatsııasy baspasóz qyzmetine bergen suhbatynda aıtty.
— Qurlyqtyq dodaǵa elimizde ázirlikti joǵary deńgeıde ótkize aldyq. Birqatar memleket bylǵary qolǵap sheberlerimen birlesken oqý-jattyǵý jıyny boldy. Daıyndyq barysynda olarmen úsh márte jekpe-jek uıymdastyryldy. Sonyń nátıjesinde ulttyq qurama sportshylaryn jasaqtaýǵa múmkindik aldyq. Ýlan-Bator qalasyna kelgenimizge birneshe kún boldy. Sol arqyly boksshylardyń jergilikti klımatqa beıimdelý kezeńine oıdaǵydaı ótkizildi. Shákirtterim aldaǵy jekpe-jekterge tas-túıin daıyn. Olardyń arasyna alty álem chempıony bar ekenin aıta keteıin. Qaı-qaısysy da birinshilik barysynda jaqsy nátıje kórsetkisi keledi. Qurlyqtyq dodaǵa barlyǵy 22 memleket boksshylary qatysady. Bas bapker retinde men úshin bul — alǵashqy úlken jarysym. Barlyǵymyz ajýapkershilik júgin sezinemiz, — dedi Nurjan Nysanov.
Bas bapker Nurjan Nysanov negizinen tájirıbeli bylǵary qolǵap sheberlerine senim artty.
Olardyń qatarynda Sanjar Táshkenbaı (50 keli), Mahmud Sabyrhan (55 keli), Orazbek Asylqulov (60 keli), Ertýǵan Zeınýlınov (65 keli), Tórehan Sabyrhan (70 keli), Sabyrjan Aqqalyqov (75 keli), Erasyl Jaqpekov (80 keli), Nurbek Oralbaı (85 keli), Saǵyndyq Toǵambaı (90 keli) jáne Aıbek Oralbaı (90 keliden joǵary) bar.
Aıta keteıik, Azııa chempıonaty 30 naýryz ben 10 sáýir aralyǵynda ótedi.
