Nurjan Nasanov bokstan Qazaqstan quramasynyń aldaǵy josparyn jarııalady
ASTANA. KAZINFORM – Bokstan Qazaqstan erler quramasynyń bas bapkeri Nurjan Nasanov qazaqstandyq bylǵary qolǵap sheberleriniń aldaǵy jospary jóninde aıtyp berdi.
Bul jóninde Qazaqstan boks federatsııasy málim etti.
– Túrkistan oblysynda ótken 2026 jyldyń alǵashqy oqý-jattyǵý jıynyn aıaqtap, Ispanııaǵa jol tarttyq. Bul jaqta birlesken jattyǵý jıynyna, ári qaraı Boxam Elite halyqaralyq týrnırine qatysamyz. Jarysqa jıyrmaǵa jýyq komanda keledi dep kútilýde. Jyldyń basy bolǵandyqtan, boksshylar biraz ýaqyt sharshy alańǵa shyqpaı qaldy. Sondyqtan bizge qazir jarys tájirıbesi asa qajet. Ispanııadaǵy týrnırge eki quram attandy. Aqpan aıynda Almaty oblysynda jattyǵý jıynyn ótkizip, taǵy eki qurammen Bolgarııadaǵy Strandja týrnırinde baq synaımyz. ıAǵnı, osy aralyqta barlyq boksshynyń shamasyn baıqaımyz. Sondaı-aq aldaǵy daıyndyq kezeńine jastar quramasyn da shaqyramyz. Bul - biz úshin jaqyn aradaǵy rezervti baqylap kórý múmkindigi. Ulttyq qurama 2026 jyldyń alǵashqy kezeńin Azııa chempıonatymen túıindeıdi. Qurlyqtyq dodaǵa deıin birneshe elmen birlesken oqý-jattyǵý jıynyn ótkizip, jyl basynan bergi jarystar men jattyǵýda ózin jaqsy kórsete bilgen boksshylardy Azııa chempıonatyna alyp baramyz. Bul - World Boxing uıymynyń eresekter arasyndaǵy alǵashqy qurlyqtyq birinshiligi. Jarys 28 naýryz-1 sáýir aralyǵynda Mońǵolııada bolady, - dedi Nurjan Nasanov.
Onyń aıtýynsha, kelesi kezeń Azııa oıyndaryna deıin jalǵasady.
– ıAǵnı, 19 qyrkúıek-4 qazan aralyǵynda Japonııada ótetin Azıadada úzdik qurammen oıyn kórsetý úshin birneshe aı boıy quramany baqylap, boksshylardy irikteımiz. Aıta keterlik jaıt, budan bylaı 23 jasqa deıingi boksshylar da ulttyq quramaǵa tikeleı qarasty bolady. Bıyl World Boxing osy jas sanatynda Azııa chempıonatyn uıymdastyrady. Al quramada 23 jasqa deıingi quramanyń daıyndyǵyna jaýapty bólek mamandar bar. Oǵan qosa 2026 jyldyń mańyzdy jarystarynyń qataryna álem kýbogynyń úsh kezeńi engizilgen. Brazılııa, Qytaı jáne Ózbekstanda ótetin World Boxing jarystaryna tyńǵylyqty daıyndalamyz.
Bas jattyqtyrýshy qyzmetine kiriskenime az ýaqyt bolsa da, boksshylarmen ózara túsinistik bar. Basty ustanym - tártip pen aýyzbirlik, qalyptasqan sheberlik mektebin buzbaı, jańa elementter engizý, - dep sózin túıindedi Nurjan Nasanov.
Aıta ketsek, Nurjan Nasanov 10 qańtarda bokstan Qazaqstan erler quramasynyń bas jattyqtyrýshysy qyzmetine Nurjan Nasanov taǵaıyndaldy. Ol belgili maman Qaırat Sátjanovty almastyrdy.
Qazaqstan boks federatsııasynan málim etkenindeı, Nurjan Nıshanuly 1975 jyly dúnıege kelgen.
2016 jyly jattyqtyrýshy mansabyn bastaǵan. 2024 jyldyń tamyz aıynan ulttyq quramanyń jattyqtyrýshysy.
Eki dúrkin álem chempıony Sanjar Táshkenbaı jáne taǵy basqa boksshylardy tárbıelegen.