Nurjan Nasanov Azııa chempıonatyndaǵy úzdik qazaqstandyq boksshyny atady
ASTANA. KAZINFORM – Bokstan Qazaqstan erler quramasynyń bas bapkeri Nurjan Nasanov World Boxing aıasyndaǵy 2026 jylǵy Azııa chempıonatyn qorytyndylady.
– Bıyl qurlyqtyq doda asa tartysty ótti deýge negiz bar. Oǵan barlyǵy 21 memelkettiń ókilderi keldi. Erler arasynda 115 bylǵary qolǵap sheberi júldeni sarapqa saldy. Shákirtterim 8 medalmen jalpykomandalyq esepte kósh basyna shyqty. Olardyń arasynan Sabyrjan Aqqalyqovty úzdik dep baǵalar edim. Ol sharshy alańda ózin jaqsy qyrynan kórsetti. Árıne, qatelikterge jol berildi. Endigi kezekte sol baǵytta bárin saralaımyz. Aldaǵy Azııa oıyndary jaqyndap keledi. Endigi kezekte soǵan daıyndalamyz. Onda boksshylar barlyǵy 6 salmaqta synǵa túsedi. Federatsııa basshylyǵy jáne bapkerler shtabymen aqyldasa otyryp, naqy quramdy anyqtaımyz, - dedi Nurjan Nasanov.
Mońǵolııa astanasy Ulanbatyr qalasynda ótken qurlyqtyq dodada elimizdiń erler quramasy 4 altyn, 1 kúmis, 3 qola medal aldy. Atap aıtar bolsaq, Azııa chempıonatynda Orazbek Asylqulov (60 keli), Sabyrjan Aqqalyqov (75 keli), Nurbek Oralbaı (85 keli), Aıbek Oralbaı (90 keliden joǵary) jeńis tuǵyryna kóterilse, Tórehan Sabyrhan (70 keli) kúmis, Mahmud Sabyrhan (55 keli), Ertýǵan Zeınýllınov (65 keli), Saǵyndyq Toǵambaı (90 keli) úzdik úshtikti túıindedi.
Al elimizdiń áıelder quramasy 2 altyn, 1 kúmis, 2 qola júldemen qorytyndylap, jalpy esepte 2-orynǵa turaqtady. Kósh basynda turǵan Úndistannyń 4 altyn, 2 kúmis, 4 qola medali bar.
Aıta keteıik, buǵan deıin Prezıdent Ulan-Batyrdaǵy Azııa birinshiliginde jeńiske jetken boksshylardy quttyqtaǵanyn jazǵan edik.
