Nurjan Áltaevtyń qujattary OSK otyrysynda qaralyp, naqty sheshim shyǵarylady - Muhtar Erman
Ortalyq saılaý komıssııasynyń hatshysy Muhtar Erman komıssııanyń brıfıngisinde osylaı dep málim etti, dep habarlaıdy QazAqparat tilshisi.
Eske salsaq, buǵan deıin OSK atalǵan úmitkerdi usyný týraly hattama burmalaný faktisine tekserilip jatqanyn málimdegen bolatyn. Al keshe lıngvıstıkalyq komıssııa Nurjan Áltaevtyń memlekettik tildi erkin meńgergenin rastap, tirkedi. Jýrnalıster «Bul Nurjan Áltaevtyń kanıdatýrasy talapqa saı ekeni anyqtaldy degendi bildire me» dep surady.
«Keshe Áltaev myrza lıngvıstıkalyq komıssııanyń otyrysyna qatysty. Emtıhannyń qorytyndysy keshe búkil aqparat quraldaryna aıtylǵan bolatyn. Komıssııanyń eki múshesi kelip, bizdiń baspasóz ortalyǵynda qysqasha kommentarıı berdi. Áltaev myrza emtıhannan ótti. Endi osy úmitkerdiń kandıdattyq máselesin, keshe de aıtqandaı, jeke otyrysta qaraımyz. Osy otyrystyń ýaqytyn sizderge der kezinde habarlaımyz», - dedi OSK hatshysy.
«Bizge qandaı da bir mártebeni belgileıtin qujat kelip tússe, ony otyrysta qaraımyz. Ol týraly sizderge de aıtylady», -dedi OSK ókili.
Aıta ketý kerek, keshe kezekten tys prezıdent saılaýyna úmitker usyný merzimi aıaqtaldy. Úmitker atanyp úlgergenderdiń sany -12. Onyń úsheýi áıel. Ortalyq saılaý komıssııasy ázirge 5 úmitker boıynsha QR Prezıdenttigine kandıdatqa qoıylatyn talaptarǵa sáıkes degen qaýly qabyldady.
