Nurjamal shaqyrady: Halyq ártisi tyńdarmanǵa esep beredi
ASTANA. KAZINFORM – Erteń Qazaqstan men Tatarstannyń Halyq ártisi Nurjamal Úsenbaevanyń shyǵarmashylyq keshi ótedi. «Nurjamal shaqyrady» atty kontsertte tyńdarmandardy ne kútip tur? «Búgin LIVE» stýdııasynda qonaq bolǵan ánshiniń ózi jaýap berdi.
Shyǵarmashylyq kesh Erkeǵalı Rahmadıev atyndaǵy Memlekettik akademııalyq fılarmonııanyń kontsert zalynda uıymdastyrylmaq. QR Memlekettik syılyǵynyń laýreaty bul kontserttiń ózi úshin óte mańyzdy ekenin aıtty.
– Erteń - meniń týǵan kúnim. Biraq men úshin eń mańyzdysy – erteń Astana fılarmonııasynyń kontsert zalynda ótetin jeke kontsertim. Osy keshke meniń áriptes-dosym Fılıp Bandjak arnaıy Praga qalasynan keldi. Men jyl saıyn týǵan kúnimdi osylaı sahnada, tyńdarmandarmen birge qarsy alamyn. Bul men úshin óte mańyzdy. Óıtkeni men óz tyńdarmandarymnyń jáne ózimniń aldymda esep beremin, – deıdi Qazaqstannyń halyq ártisi.
Keshte chehııalyq barıton Fılıp Bandjak ta óner kórsetedi. Ánshi qazaq tilinde óner kórsetedi eken.
– Bul kontsertke men álemdegi eń tanymal opera ánderin tańdadym. Atap aıtqanda, Fıgaronyń áni, Don Jýannan úzindi jáne belgili kompozıtor Tólegen Muhamedjanovtyń «Otan» ánin qazaq tilinde oryndaımyn. Qazaq tili kóp tilderge uqsamaıdy. Ony durys aıtý, dybystaý biraz qıyndyq týdyrady. Degenmen, keıbir dybystary cheh tiline uqsaıdy, – deıdi kesh qonaǵy.
Nurjamal Úsenbaeva kontsertte jańa týyndylaryn tyńdarman nazaryna usynbaq.
– Fılıp ekeýmiz bul kontsertke kún saıyn daıyndalamyz. Kontsert sımfonııalyq orkestrdiń súıemeldeýimen ótedi. Dırıjeri – Abzal Muhıtdınov. Fılarmonııanyń barlyq ujymy osy kontsertke qatysady. Sonymen qatar, kontsert barysynda álemdik opera repertýarynan da shyǵarmalar oryndalady. Jáne men ózimniń jańa týyndylarymdy da oryndaımyn. Bul shyǵarmalardy sahnaǵa shyǵarýdy burynnan armandap, ózime maqsat etip qoıǵan edim. Sahnaǵa shyǵar aldynda únemi qobaljyp, «qalaı bolady eken» dep ýaıymdaısyń. Óıtkeni men kásibı deńgeı qandaı joǵary bolý keregin jaqsy bilemin. Sol deńgeıden túspeýge tyrysamyn. Ol úshin kúndelikti eńbek pen úzdiksiz izdenis qajet.
«Búgin LIVE» baǵdarlamasyna suhbat bergen Fılıp Bandjak áriptesi Nurjamal Úsenbaevanyń óneri týraly pikir bildirdi.
– Biz Nurjamal Úsenbaevamen kóptegen jyldar boıy birge jumys istep kelemiz. Ol – tamasha adam ári tamasha ánshi. Onymen birge jumys istep júrgenime óte qýanyshtymyn. Men onyń daýysyn burynnan bilemin. Adamnyń daýysy ómir jolynda ózgerýi múmkin. Biraq men jas kezimde estigen Nurjamal Úsenbaevanyń daýysy qazir de sol qalpynda – esh ózgermegen, áli de óte ádemi, – deıdi ol.
Aıta keteıik, bıyl Nıý-Iorktiń áıgili sahnasy Madison Square Garden-de Dımashtyń kontserti ótedi.