Nurymbetov: Bilim berý júıesin jumys berýshilerdiń talaptaryna beıimdeýimiz qajet

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Birjan Nurymbetov pen Bilim jáne ǵylym mınıstri Ashat Aımaǵambetov jańa kásiptik standarttar negizinde bilim berý baǵdarlamalaryn ázirleý máseleleri jónindegi keńeske qatysty, dep habarlaıdy QazAqparat tilshisi.

«Byltyr mamyr aıynda QR Prezıdenti Qasym-Jomart Toqaev eńbek naryǵyndaǵy suranysqa ıe mamandyqtardy daıarlaý boıynsha bilim berý baǵdarlamalaryn jan-jaqty jetildirý jóninde tapsyrma bergen bolatyn. Osy máselege qatysty eki mınıstrlik kóptegen jumys atqaryp jatyr. Onyń biri – elimizdegi ulttyq biliktilik júıesin qalyptastyrý sharalarynyń aıasynda jumystar jasalýda», - dedi keńesti ashqan Birjan Nurymbetov.

Onyń aıtýynsha, ulttyq biliktilik júıesin qalyptastyrý baǵytynda qajetti sharalar belgilengen. Olardyń qatarynda barlyq sala boıynsha salalyq biliktilik aıasyn, kásiptik standarttardy bekitý bar.

«Búgingi tańdaǵy ózekti másele - bolashaq túlektiń eńbek naryqta suranysqa ıe bolýy. Bul rette eńbek naryǵynyń qajettiligin eskere otyryp, kásiptik standarttar negizinde kadlar daıarlaý júıesin qurý basymdyqqa ıe bolyp otyr. Bizdiń Bilim mınıstrligimen ortaq mindetimiz - bilim berý júıesin jumys berýshilerdiń talaptaryna beıimdeý jáne kásiptik standarttar negizinde bilim berý baǵdarlamalaryn ázirleý boıynsha naqty is-qımyl algorıtmin iske asyrý», - dedi mınıstr.

Keńes barysynda kásiptik standarttar negizinde bilim berý baǵdarlamalaryn ózektendirý jáne ázirleý algorıtmderi talqylandy. Shara sońynda QR Eńbek jáne halyqty áleýmettik qorǵaý mınıstri Birjan Nurymbetov pen Bilim jáne ǵylym mınıstri Ashat Aımaǵambetov vedomstvolardyń talqylanǵan baǵytta odan ary yntymaqtastyǵyn retteıtin memorandýmǵa qol qoıdy.