Nurym Sálimgereev «Syr Barysy» atandy
ASTANA. QazAqparat - Qyzylorda qalasyndaǵy «Evrazııa» sport kesheninde qazaq kúresinen oblystyq «Altyn belbeý» saıysy ótip, Nurym Sálimgereev «Syr barysy» atandy, dep habarlaıdy QazAqparat tilshisi.
Oblystyq sport basqarmasynyń baspasóz qyzmeti málim etkendeı, bıyl toǵyzynshy márte uıymdastyrylǵan aıtýly báseke Astana qalasynyń 20 jyldyǵy Qyzylorda qalasynyń 200 jyldyǵy aıasynda ótkizildi.
Boz kilemdegi balýandar úsh kezeń boıynsha tórt jas deńgeıinde synǵa tústi. Birinshi kezeńi ár aýyldyq aımaqtarda naýryz aıynda ótkizilip, oǵan 6 839 sportshy qatysty. Ekinshi kezeńi aýdandyq, qalalyq jarystar sáýirde uıymdastyrylyp, oǵan 1 511 sportshy baq synassa, úshinshi kezeńi - oblystyq saıysqa 250 balýan baq synady. Úsh kezeń boıynsha barlyǵyna 8 600 sportshy synǵa tústi.
Túıe balýan saıysyna 15 sportshy qatysyp, olardyń arasynda Nurym Sálimgereev «Syr barysy» atanyp, «Altyn belbeý» beldigi men 1 mln 170 myń teńgeniń sertıfıkatyna ıe boldy.
Ekinshi oryn alǵan «Syr arlany» - qyzylordalyq Maqsat Isaqabylovqa buıyrdy. Ol 630 myń teńgemen marapattaldy. Al úshinshi orynda «Syr suńqary» atanǵan Jasulan Dosymov 360 myń teńgege ıelik etti.
Endi osy jyly Astanada ótetin respýblıkalyq «Qazaqstan barysy» týrnırinde Qyzylorda oblysynyń namysyn atalǵan dodada birinshi jáne ekinshi oryn alǵan Nurym Sálimgereev pen Maqsat Isaqabylov qorǵaıtyn bolady.
