Nurtóre Júsip: Toqaev júıeli tártip jasaýǵa kiristi
ASTANA. KAZINFORM — Qazaqstan Halyq Keńesiniń múshesi Nurtóre Júsip áleýmettik jelide «Samuryq-Qazyna» jáne «Qazaqstan temir joly» basshylarynyń ustalýyna qatysty pikir bildirdi.
Aıtýynsha, bul Prezıdenttiń «Zań men tártip» qaǵıdatyn berik ustanatynyn bildiredi.
– Prezıdent Qasym-Jomart Toqaev «Zań men tártip» degen qaǵıdatty berik ustana bastady. Búgin Samuryq pen QTJ sekildi alpaýyt kompanııa basshylarynyń quryqqa ilinýi - sonyń aıqyn dáleli. Buryn tek shabaqtar men shortandar qarmaqqa ilinse, búgin eki birdeı akýla aýǵa tústi. Aq-qarasyn tergep-tekserýshiler anyqtaı jatar. Bizdi osyndaı qarjylyq mekeme basshylarynyń kózsiz áreketi oılandyrady, - dedi ol.
Sonymen qatar jemqorlyq qylmysy memlekettiń irgetasyn iritetinin atap ótti.
– «Samuryq-Qazyna» Ulttyq qordyń qarjysyna ıelik etedi. QTJ - memleket ishindegi kishigirim memleket tárizdi qurylym. Mundaı qadamǵa nelikten bardy? Kúnkórisi tómen be? Aılyqtan bólek bir ǵana jyldyq bonýsy pálen muǵalim men túgen dárigerdiń jyldyq tabysyn birneshe ese oramaı ma!?. Toıymsyzdyq, ashkózdik, qanaǵatsyzdyq, jaýapsyzdyq, julymyrlyq pen jemqorlyq memlekettiń irgetasyn iritip, shiritetinin bile tura, osyndaı joıqyn jemqorlyqqa ne úshin baryp jatyr? Nege toqtam joq? Prezıdent ustanymy durys. Zań buzdyń ba, aryńmen de, baryńmen de jaýap ber! Taza qoǵam qurý úshin tazalaný kerek-aq. Jurtqa keregi - júıeli tártip, - dedi Nurtóre Júsip.
Aıta keteıik, «Samuryq» qory men oǵan enshiles QTJ basshysynyń ustalǵany týraly habardan keıin memlekettik aktıvterdi basqarýshylardyń jaýapkershiligi taǵy da talqyǵa tústi. Saıasattanýshylar bul oqıǵany bıliktiń «Zań jáne tártip» qaǵıdatyn júzege asyrýǵa kóshkeniniń belgisi dep sanaıdy.
