Nurtóre Júsip sheteldegi qazaqtildi BAQ qaýymdastyǵynyń tóraǵasy bolyp taǵaıyndaldy
«Syrttaǵy qandastarymyzdyń aýyzbirshilginiń berik bolýyna «Otandastar» qorynyń qosyp jatqan úlesi zor. Búgingi qaýymdastyqtyń qurylýy - sonyń dáleli. Bul bastamany erterek qolǵa alý kerek edi, degenmen ıgi istiń erte-keshi joq. Jańa sheteldegi baýyrlarymyzdy tyńdap, ar jaqta bolsa da otanǵa degen ińkárligin sezip otyrmyz. Aldaǵy ýaqytta jańadan qurylyp otyrǵan sheteldegi qazaqtildi BAQ qaýymdastyǵynyń jumysynyń ilgerileýine bárimiz biraýyzdan atsalyssaq deımin. Mysaly, kórshi Reseıde qazaqsha BAQ-tar óte belsendi jumys isteıdi. Olar jyl saıyn Sochı jáne basqa da qalalarda bas qosyp, ózara tájirıbe almasyp jatady. Túrli forým, jıyndar ótkizip turady. Ol jerde qandastarymyz óz máselelerin ortaǵa salyp, sonyń sheshimin izdeıdi. Osy baǵyttaǵy jumysty basqa elderde de damytý qajet. Alda bizdi biraz sharýa kútip tur, bastamamyz sátimen bolsyn» , - dedi Nurtóre Júsip.
Buǵan deıin habarlaǵanymyzdaı, búgin Qazaqstanda sheteldegi qazaqtildi buqaralyq aqparat quraldarynyń basyn biriktirgen assotsıatsııa quryldy.
