Nurtóre Júsip kitaphana qyzmetkerleriniń jalaqysyn kóterýge qatysty usynys jasady

NUR-SULTAN. QazAqparat – Senator Nurtóre Júsip elimizdiń kitaphanalary men muraǵattaryndaǵy birqatar máselelerdi atap ótip, osy saladaǵy qyzmetkerlerdiń eńbekaqysyn kóterýdi surady. Ol Senat otyrysynda elimizdiń Premer-Mınıstrine osyndaı depýtattyq saýal joldady, dep habarlaıdy QazAqparat tilshisi.

Osy oraıda ol 2020 jylǵy 1 qańtardan respýblıkalyq mádenıet uıymdary qyzmetkerleriniń jalaqysy, sondaı-aq óńirlik deńgeıde óskenin eske saldy. Bul basqarýshy jáne negizgi personaldarǵa ǵana qatysty.

«Al qosalqy personal, ınjenerler, programmıster men kitaphanalardyń fýnktsıonaldyq qyzmetin qamtamasyz etetin mamandar jalaqysy kóterilmeı qalǵan. Aımaqtardaǵy kitaphanashylar aılyǵy budan da tómen», - dedi Nurtóre Júsip.

Senator kitaphana qyzmetkerleriniń jalaqysyn kóterip qana qoımaı, elimizdiń kitaphanalaryn, kitap qoımalary men muraǵattaryn materıaldyq-tehnıkalyq qamtamasyz etý problemalaryn sheshý mańyzdy dep sanaıdy.

Depýtattyń aıtýynsha, Ulttyq muraǵat qory týraly Ereje jetildirýdi talap etedi. Osy ýaqytqa deıin arhıvtik aqparat týraly Birtutas respýblıkalyq klassıfıkator jasalmaǵan. Mundaı klassıfıkator zamanaýı katalogtardy, málimetterdiń elektrondyq bazasyn, elektrondy arhıv, aqparat izdeý salasyn damytý úshin asa mańyzdy.