Nurtóre Júsip: Qasym-Jomart Toqaev bılik sabaqtastyǵyn qamtamasyz etip, elge jańa serpin ákeldi
«Táýelsizdik turaqtylyq pen tynyshtyqqa arqaı súıeıdi. Elimizdiń damýy osy eki tetikke tikeleı baılanysty. Týra bir jyl buryn Nursultan Nazarbaev óz ókilettigin toqtatý týraly sheshim qabyldady. Qazaqstannyń Tuńǵysh Prezıdenti – Elbasy respýblıkalyq telearnalarda tikeleı efır arqyly xalyqqa óte mańyzdy úndeý jasap, 30 jyldyq basqarý qyzmetin qorytyndylady», - dedi senator.
Osy rette Nurtóre Júsip QR Tuńǵysh Prezıdenti Nursultan Nazarbaevtyń: «Men Qazaqstan Respýblıkasynyń Prezıdenti retindegi ókilettigimdi toqtatý jóninde sheshim qabyldadym. Bul – ońaı sheshim emes. Bıyl elimizdiń eń joǵary laýazymyndaǵy qyzmetimdi atqaryp kele jatqanyma 30 jyl tolady. Halqym maǵan táýelsiz Qazaqstannyń Tuńǵysh Prezıdenti bolý múmkindigin berdi. Keńes ımperııasy qulaǵan sátte bizdiń saıasatymyz ben ekonomıkamyz quldyrap qaldy. El ishinde qobaljý men túsiniksiz jaǵdaı oryn aldy. Іshki jalpy ónim eki ese qysqardy, azyq-túlik pen halyq tutynatyn taýarlardyń tapshylyǵy aıqyn sezildi. Bir mezette iri zaýyttardyń bári toqtap qaldy. Dúnıe tóńkerilip ketkendeı kórindi. Bul synaq bolatyn. Biz odan súrinbeı ótip, damýdyń qazaqstandyq jolyn salýǵa belsene kirisip kettik. Bizdiń úshtuǵyrly mindetimiz – naryqtyq ekonomıka qurý, totalıtarlyq ıdeologııalyq júıeni buzý jáne qoǵamnyń barlyq ınstıtýttaryn jańǵyrtý boldy. Biz muny zamanaýı demokratııalyq memleket – Qazaqstan Respýblıkasyn qurý úshin jasadyq», - degen sózine nazar aýdartady.
«Elbasy eń qıyn shaqta el damýyn aıqyndap, strategııalyq turǵyda óte durys tańdaý jasady. Elge syrttaǵy qandastarymyzdy shaqyryp, olarǵa úlken qoldaý kórsetti. Saryrqanyń tósinen jańa qala turǵyzdy. Elordasy men el shekarasyn myqtap, Táýelsizdikke qorǵan bolar barlyq qajetti sharany jasady. Túrli syn-qater, qaýiptiń aldyn alýǵa umtyldy. Eń bastysy - Elbasy elmen birge boldy. Jańa bastamalarǵa jeteledi. Elbasy Qazaqstannyń damý jolyn der kezinde aıqyndady. Bul – demokratııa men naryq joly bolatyn. Sonyń arqasynda elimizde birqatar ekonomıkalyq-áleýmettik reformalar jedel júzege asyryldy. Ekonomıkada 15 ese, al halyqtyń tabysy 9 ese (dollarmen eseptegende) artty. Kedeıshilik deńgeıi 10 esege jýyq qysqardy. Bul ońaılyqqa túsken joq. Eldegi ózgeristerdiń bári kóz aldymyzda júrip jatyr. Dúken sóreleri jylan jalaǵandaı bos qalǵan kezdi de kórgenbiz. «Táýelsiz Qazaqstan memleketiniń negizin qalaýshy retindegi aldaǵy mindetim – basshylardyń jańa býynynyń bılikke kelýin qamtamasyz etý. Olar elimizdi jańǵyrtý protsesterin jalǵastyratyn bolady» - degen edi Elbasy. Qazaqstandaǵy bılik aýysý úrdisi zań sheńberinde ótti. Memleket basshysynyń ýaqytsha mindetin atqarý Parlament Senatynyń tóraǵasy Qasym-Jomart Toqaevqa júkteldi. Búkilhalyqtyq saılaýda Qasym-Jomart Kemeluly Toqaev basym daýyspen Prezıdent bolyp saılandy», - dedi ol.
Senator «Nur Otan» partııasynyń sezinde Elbasy Toqaevqa úlken senim artatynyn málimdegenin, «Ol Qazaqstan táýelsizdiginiń alǵashqy kúnderinen bastap menimen birge jumys istep keledi. Men ony jaqsy bilemin. Ol – adal ári jaýapkershiligi joǵary azamat. Elimizdiń ishki jáne syrtqy saıasatyn jan-jaqty sezinedi. Ol barlyq baǵdarlamalardy ázirleýge jáne qabyldaýǵa atsalysty. Qasym-Jomart Kemeluly Qazaqstandy basqarýǵa naǵyz laıyqty azamat dep senemin», degen sózin eske salady.
«Qasym-Jomart Toqaev bılik sabaqtastyǵyn qamtamasyz ete bildi. Evolıýtsııalyq damýdy jalǵastyra otyryp, elge jańa serpin ákeldi. Qoǵammen ashyq dıalogqa den qoıdy. Pikirler sanalýandyǵyna negizdelgen memlekettik damýdyń jańa baǵytyn qalyptastyrýǵa kúsh saldy. «Ár alýan pikir - birtutas ult», «Kúshti Prezıdent - yqpaldy Parlament, esep beretin Úkimet» degen jańa baǵdar qolǵa alyndy», - dedi Nurtóre Júsip.
Onyń paıymynsha, Qazaqstan Prezıdenti Qasym-Jomart Toqaev jańa qyzmetinde ózin tabandy saıasatker ekenin kórsetti. Memleket basshysy retinde ashyqtyq saıasatyn ustandy. Áleýmettik jelilerdiń belsendi qoldanýshysy bola otyryp, elimizde bolǵan kez kelgen ózekti oqıǵaǵa jedel baǵa berdi. Túrli áleýmettik toptardyń ókilderimen betpe-bet kezdesip, ózekti máselelerdi ashyq talqylap keledi.
«Halyq únine qulaq asatyn memleket» qaǵıdatyn jarııalady. Bul Memleket basshysyna degen eldiń senimi men qurmetin oıatty. Elde órshı túsken jynystyq zorlyq-zombylyq, mal urlyǵy, esirtki taratý, mas kúıde kólik júrgizý, brakonerlik jáne qoryqshylardyń ómirine qol suǵýshylyq sııaqty ótkir máseleler úshin qylmystyq jaýapkershilikti qatańdatýdy kózdeıtin sharalardyń tutas keshenin belgiledi. Halyq bul sheshimderdi qoldady. Prezıdenttiń Ulttyq qoǵamdyq senim keńesin qurýy da mańyzdy qadam boldy. Bılik sabaqtastyǵy syndarly sıpat aldy. Memlekettiń turaqtylyǵy saqtaldy. Bul – el damýyndaǵy erekshe másele», - dep túıindedi sózin Senat depýtaty.
