Nurtóre Júsip elimizdegi mektepterdi kúzetý júıesine qatysty usynys aıtty
Depýtat Petropavl qalasyndaǵy 9-synyp oqýshysy mektepke balta men pyshaq alyp kelip, úsh balany jaraqattaǵan qaıǵyly jaǵdaıdy eske saldy.
Nurtóre Júsip osyǵan baılanysty mundaı tótenshe jaǵdaılardy boljaý júıesindegi, erte aldyn alýdaǵy kúrdeli problemalarǵa nazar aýdardy. Senator elimizde bul baǵyt boıynsha mańyzdy ǵylymı baza joq ekenin aıtty. Oqýshylardyń psıhologııalyq portretin jasaý, otbasynyń áleýmettik jaǵdaıyn anyqtaý kezinde depressııaǵa nemese agressııaǵa beıim balalardy aldyn ala oqshaýlaý eskerilmeıdi.
«Kóp satyly keshendi qaýipsizdik júıesin jasaýdy kún tártibine shyǵarý kerek. Álem elderinde mundaı tájirıbeler bar. Qaı el bolsyn bul máselege asqan jaýapkershilikpen qaraıdy. Máselen, Qytaıda mektepke tek oqýshynyń da, ata-ananyń da sýreti bar arnaıy kýálikpen kirýge bolady. Kez kelgen oqý ornynda kúzetshi kabınkasy qoıylǵan. Kelgen adamnyń kýáligi bolmasa, tek muǵalim ǵana ertip kire alady. Al Frantsııada oqýshylarǵa ǵımaratqa alyp kirýge bolmaıtyn zattar tizimi jazylǵan nusqaýlyq beriledi. Sabaq arasynda rıýkzaktar men portfelder tekseriledi. Jylyna eki ret antıterrorıstik jattyǵý sabaqtary ótkiziledi», - dedi senator.
Depýtat «Bilim týraly» Zańynda oqýshylar men ustazdardyń qaýipsizdigin qamtamasyz etý týraly bir aýyz sóz joq ekenin aıtty.
«Elimizdegi bilim berý mekemelerinde krımınaldyq jáne terrorıstik sıpattaǵy qaýip-qaterden qorǵaıtyn, oqý oryndaryndaǵy oqýshylardy, muǵalimder men qosalqy personaldy saqtaýǵa arnalǵan qaýipsizdikti qamtamasyz etýdiń tıimdi júıesin jasaý jóninde shuǵyl keshendi sharalar qabyldaýdy suraımyz», – dedi Nurtóre Júsip.
Esterińizge salaıyq, Petropavldaǵy №4 mekteptiń 9-synyp oqýshysy sabaqqa balta-pyshaqpen qarýlanyp kelip, úsh balany jaraqattaǵan edi.
Foto: senate.parlam.kz
